Претходен број

ЕДИТОРИЈАЛ

Нов градоначалник, стари проекти

Деспина Трајковска

Само по еден месец откако ја презеде градоначалничката функција, Коце Трајановски разочара дел од своите избирачи. Призна дека мала е веројатноста во почетокот на мандатот да стартува некој свој проект од десетиците ветени во изборната кампања и напишани во цела една книга. Нов Луна парк, жичница до Водно, повеќе подземни премини, се еден мал дел од ветувањата на Трајановски кои годинава ќе останат само на хартија.

Но, тоа не значи дека новиот градоначалник ќе седи со скрстени раце. Рече ќе работи на дозавршување на проектите на Костовски, а ќе преземе и свои „ситни“ зафати. Но, така, во првиот турнус од раководењето со Скопје неговите граѓани нема да видат ништо од големите најавувани можности на градскиот татко. И во блиска иднина Вардар ќе има низок водостој, кај „Бисер“ и „Тифани“ пешаците со страв ќе ја минуваат улицата, љубителите на Водно само на сон до Крстот ќе стасуваат со жичница...

Асфалтирана улица и променета светилка, колку и да е од витално значење за нормално скопско секојдневие, сепак, нема да ги задоволат скопјани доколку тие не заборавиле на мегаломанските ветувања на сегашниот градоначалник. По втор пат да беше на челната позиција во Гази Баба, можеби нејзините жители и ќе се задоволеа со такви ситни инфраструктурни зафати.

Но, Трајановски на Скопје му вети препородување, европски лик, живот како во вистинска метропола, вети брда и долини на сто и кусур страници изборна програма, која тешко и се дочитуваше. Годинава, според најавите, неговите реализирани идеи едвај ќе се бројат на прсти. Веројатноста дека ќе биде така е уште поголема ако не се заборави дека речиси сите проекти новиот градоначалник ги најавуваше како заеднички со Владата. Дури и оние со општинските колеги ќе ги реализираа забавено оти светската криза не ги заобиколила ниту скопските општини.

Оправдувањата дека во 2009 година нема да стартува ниту еден капитален проект оти принудно ќе го скуси буџетот поради економската криза се неиздржани. И Трајановски ја пее истата песна како и централната власт, која во предизборието даваше цврсти гаранции за способностите на своите градоначалници. Но, уште за време на изборите дуваше ураганот на финансиската криза. Тогаш Груевски и Трајановски (не)свесно не го чувствуваа, па дури и кога ги промовираа пловен Вардар и каскадите во него и додека шетаа по скопските населби на голините каде што ветуваа изградба на капитални објекти.

По се' изгледа, тактичката игра запали кај најголемиот дел од скопјани кои веруваа дека Трајановски ќе им го препороди градот. Но, за жал, само за триесетина дена тој им ги урна надежите. Единствено ги информираше дека затекол лоша финансиска состојба во неколку јавни претпријатија и се пожали на превработеност на градската администрација. Но, не рече конкретно дали и што ќе преземе и каков механизам воопшто ќе употреби за евентуално нормализирање на состојбите. Зошто остана без конкретен одговор, не појасни.

Менаџирањето со главниот град ни оддалеку не е еднакво со челната општинска позиција, од која се трансферираше по изминатите четири години. Па од таква позиција Трајановски дури треба и да се подзамисли дали е потребно свечено да предава во употреба неколку стотици квадрати асфалтиран простор наменет за автобуско свртувалиште.

Ако преовладее оптимизмот, тогаш народната - по утрото се познава денот можеби и ќе се замени со - крајот го краси делото. Трајановски ја има моќта да го направи тоа. Згора на се', има и поддршка од централната власт што, сепак, не беше случај со неговиот претходник кој, и покрај се', остави полн буџет и започнати и до половина реализирани повеќе капитални проекти.