Претходен број

САД останува стратешки партнер на Македонија 

Заменикот на Хилари Клинтон, Џејмс Штајнберг вчера во Македонија 

Web Update - 00:30, 17.05 - САД останува стратешки партнер на Македонија и ги поддржува напорите во рамките на ОН за изнаоѓање прифатливо решение за разликите околу името.

Ова попладнево во Скопје го изјави заменикот државен секретар на САД Џејмс Стајнберг на заедничка прес конференција со македонскиот премиер Никола Груевски, јавува Макфакс.

„Ги поддржуваме напорите на медијаторот Метју Нимиц да се изнајде заеднички прифатливо решение, бидејќи тоа е во интерес на двете земји. Ние ќе продолжиме да го поддржуваме овој процес на преговори за изнаоѓање решение за името“, изјави Стајнберг.

Стајнберг во Македонија пристигна од Грција, каде доцна вечер во петокот имаше средби со грчкиот премиер Костас Караманлис и со шефицата на грчката дипломатија Дора Бакојани. (Макфакс)

Текст од печатеното издание:

Димитар Чулев

Може со сигурност да се тврди дека американската администрација одново му се враќа на Балканот незадоволна од тоа како Европската унија ги менаџира сериозните отворени прашања во овој дел на стариот континент. Вчера во Атина, а денес во Скопје, гостин е американскиот заменик-државен секретар, Џејмс Штајнберг.

Вториот човек на американскиот Стејт департмент денес попладнето ќе има средба најпрво со премиерот Никола Груевски, а потоа и со претседателот Ѓорге Иванов. На двете средби ќе биде присутен и шефот на македонската дипломатија, Антонио Милошоски. Несомнено, поголемиот дел од разговорот ќе биде посветен на македонско-грчкиот спор околу името. Спорот постојано се нагласува и како пречка од европски дипломати за добивање датум за преговори за ЕУ, па дури и за процесот за визна либерализација, што во дипломатски кругови се третира за нонсенс.

Вчера во Атина, Штајнберг разговараше со Дора Бакојани и Костас Караманлис, а дел од разговорите сигурно беа посветени за грчко-македонскиот спор за кој Вашингтон веќе подолго време, а особено во последната година на администрацијата на Буш инсистираше за брзо решение. До затворање на весникот не беа познати детали, но портпаролот на грчкото МНР, Кумуцакос, пред средбата изјави дека „ не очекува конкретна американска иницијатива“ за решавање на спорот со името.

Која е целта на посетата на Штајнберг на Атина и на Скопје, може да се загатне од изјавите на заменик-помошникот на државниот секретар на САД, Стјуард Џонс, кој во разговор со а��редитирани новинари во Брисел изјави: „Ајде да се фокусираме само на разговорите околу името и да одиме напред... Членството на Македонија во НАТО останува приоритет на САД“, изјави во понеделникот во Брисел американскиот заменик на помошник-државниот секретар, Стјуард Џонс, според кого преговорите би можеле да донесат повеќе резултати доколку немаше некои други странични прашања.

Американскиот амбасадор Филип Рикер, на предавањето за „Правците на надворешната политика на САД под администрацијата на Обама“, вчера на Американскиот колеџ во Скопје повтори дека позицијата на САД во однос на Македонија останува „многу иста“. Ова може да се толкува дека продолжува американската поддршка на Македонија за НАТО, особено истакнувана во последната година од мандатот на Буш.

Дел од грчкиот печат, во пресрет на посетата на Штајнберг (кој учествува на годишниот собир на клубот на светски моќници Билдерберг), загрижено констатира дека во последно време било забележливо раздвижување во Вашингтон во врска со македонско-грчкиот спор што било резултат на оцената на Американците дека членството на Македонија во НАТО и во ЕУ било „неопходно за стабилноста на земјата“, пишува „То вима“.

Во оптек се и информации дека САД се подготвуваат да именуваат нов специјален пратеник за Балканот, но амбасадорот Рикер вчера демантира дека тоа би можело да биде заменик-државниот секретар Штајнберг. „Тој е многу повисоко ниво“, прокоментира Рикер.

Посетата на Штајнберг доаѓа само неколку дена пред најавената посета на американскиот потпретседател Џозеф Бајден на регионот во чии рамки ќе ги посети Босна, Србија и Приштина. Во дипломатски кругови посетата на потпретседателот Бајден на Сараево треба да ја изрази загриженоста на Вашингтон со нестабилната ситуација во Босна и со „студениот мир“ кој постои на релација Белград - Приштина, а претставува сериозна закана за Балканот.

Заобиколувањето на Македонија од Бајден може да значи дека Вашингтон, сепак, ја издвојува од „проблематичните“ локации во регионот.