Ултрадесничарите во владата на Нетанјаху
Авигдор Либерман, лидерот на Исраел беитеину ќе стане министер за надворешни работи
ЕРУСАЛИМ - Израелскиот премиер Бенјамин Нетанјаху потпиша коалиционен договор со екстремо десничарската партија Исраел беитеину, изјавија официјални лица. Според договорот Авигдор Либерман, лидерот на Исраел беитеину ќе стане министер за надворешни работи, открија официјални лица од партијата Ликуд на Нетанјаху. Тој е жесток поддржувач на движењето на израелските доселеници и се противи на размена на територии за постигнување мир со Палестинците. На Ликуд се' уште му е потребна поддршката од други партии за да обезбеди мнозинство во парламентот. Исраел беитеину ќе добие пет места во кабинетот, вклучувајќи ги оние за внатрешна безбедност, инфраструктура, туризам, и интеграција на нови доселеници. Нетанјаху побара поддршка и од центристичката партија Кадима, но претходните разговори завршија без постигнување договор. Лидерката на Кадима, Ципи Ливни изјави дека нејзината партија ќе биде „одговорна опозиција“. Кадима ја поддржува идејата за формирање на палестинска држава во Западниот Брег и Газа, на што се противи Ликуд. Нетанјаху има краен рок до 3 април да формира влада по изборите што се одржаа во февруари. (Би-Би-Си) |
