Ѓоко Танески замина за Осло

„Единствен фаворит ми е Македонија“, ни изјави нашиот евровизиски претставник Ѓоко Танески непосредно пред заминувањето со автомобил за Осло, Норвешка, каде што од 25 до 29 мај ќе се одржи најновото издание на Евровизија. Танески вчера го испратија повеќе фанови кои се собраа пред Факултетот за туризам и менаџмент за да му ја искажат својата поддршка пред настапот на 25 мај во арената „Теленор“ во Осло. Откако се поздрави со обожавателите и дел од колегите од домашната естрада, Ѓоко Танески заедно со својот рапер Били Ѕвер и ПР-асистентката Ема Темелковска, во полициска придружба и поддржувачи на велосипеди замина низ улиците на Скопје, преку центарот на градот, па се' до неговиот излез. Од неговото патување е предвидено да се снима и документарен филм.

Танески во Осло ќе настапи како 15. во првата полуфинална вечер со песната „Јас ја имам силата“. На 17 мај го очекува првиот прес и техничка проба, а како што ни изјави, убеден е дека ќе се пласира во финалето и дека ќе ја израдува Македонија. Да му посакаме среќа и поуспешен пласман!