Поглед

Чиј е киксот?

Деспина Трајковска

Кратко траеше радоста на оние скопјани што се осудени да користат градски превоз. Десетиците украински автобуси што стасаа зимоска, дефинитивно, беа голема причина граѓаните да им се израдуваат како мали деца. Но, по веста дека доцни последната ЛАЗ-ова пратка, на корисниците на ЈСП како да им преседнаа и оние што се веќе стасани. Привилегијата да се возат во нови, а за периодов најбитно и климатизирани автобуси ја имаат само патниците во поурбанизираните средини. Прашање е кога и дали воопшто ќе го дочекаме денот нископодните украински возила да крстосуваат низ цело Скопје, што е проценето дека ќе се постигне со пазарените 84 автобуси од кои 4 се дупли.

Во недостиг од официјални информации, јавноста е во недоумица. Ставена е во состојба да ги мери и сече шпекулациите за причините на киксот на Украинците. Навистина ли е фабриката пребукирана со работа или, пак, нешто друго е во прашање? Репризна ситуација која наведува дека производителот не е засегнат од пеналите што му ги пресметува нашата држава. Не само што од ЛАЗ не се дисциплинираа туку, наводно, се откажале да ни ги произведат четирите дупли автобуси. Се' на се', дилеми и трилеми. Излезе ли на виделина портфолиото на фабриката, нејзините капацитети или, пак, во прашање е бизнис-математиката на нејзиниот сопственик, кој има повеќе црни дамки.

Кој пат и да го фати вистината, скопјани се во загуба. Барем државата секојдневно ќарува по некое евро од пеналите. Но, ете го 8 септември до кога речиси е сигурно дека ќе почнат да се возат испратените 68 двокатни автобуси. Не за џабе работливите Кинези го вртат светот.

А, всушност, ако Владата се водеше по сопствената парола „Купувајте македонски производи“, можеби се' ќе беше поинаку и на подобро.