И по десет години, Карпалак без споменик

Панихида во чест на загинатите бранители

Гојко Ефтоски

Десет години по конфликтот во 2001 година, на Карпалак, на местото на најмасовното злосторство каде што на подмолен начин беа убиени десетмина прилепчани од резервниот состав на АРМ, и денес нема споменик, освен спомен-плочата, која неколку пати беше кршена.

„Нашите најмили што овде загинаа заслужуваат почит и внимание. Во државата не се најде подготвеност да се изгради спомен-белег. Мојот брат Пеце остави по него да тагуваат мајка, татко и сестра“, изјави Гоце Секуловски од прилепско Бело Поле.

Ацо Јованоски-Реган, возач на тешко оштетениот автобус што се запали погоден од ракети, очигледно растревожен емотивно, присетувајќи се на тешките мигови од 8 август 2001 година, изјави: „На ова место бевме пречекани со изненаден вкрстен оган и притоа 10-мина убиени на лице место. За овие изминати десет години уште шестмина починаа како последица од тешките повреди, трауми и шокови од настанот. Карпалак заслужува вистинска почит и нужно внимание од органите на државата, кои еве, не најдоа начин достоинствено да им се оддолжат на загинатите. Ние им ја укажуваме нашата чест и вистински живееме за настанот на ова место“, рече Ацо Јовановски-Реган.

Од име на Здружението на резервните воени обврзници-учесници во настаните, од Прилеп ја пренесе реакцијата Јордан Трајкоски. „Револтирани сме од толкувањето на Законот за амнестија дека во него можеле да се вклучат и хашките случаи. Амнестирањето на сторителите на нечовечки и најкрволочни дела е непромислена одлука. Со ваквата солуција се девалвираат жртвите на загинатите бранители, а се амнестираат злосторници. Ова толкување за амнестија би го прифатиле како нужна реалност доколку амнестираните ја признаат својата грешка и се извинат пред македонската јавност, а наедно ги посочат и посетат местата каде што биле извршени злоделата и им дадат достојна почит на жртвите на загинатите бранители“, рече Трајкоски и го повика новиот министер за одбрана, Фатмир Бесими, да покаже доблест и да положи цвеќе на местото каде што загинаа прилепските бранители.

Чествувањето во месноста Карпалак вчера започна со панихида што ја опслужија прота ставрофор Мирко Станковски и отец Теодосиј од Тетовското архиерејско намесништво. Потоа, кај спомен-плочата на загинатите венци положија претставници на Кабинетот на претседателот, на Владата и Собранието, на Министерството за одбрана и Генералштабот на АРМ, роднини на загинатите од Прилеп, политички организации и здруженија од Прилеп и од Тетово.

Кај Карпалак пред десет години, само пет дена пред потпишувањето на Охридскиот рамковен договор, врз воениот конвој кој од Прилеп се движеше кон Тетово, превезувајќи припадници на резервниот армиски состав, извршено е најмасовното злосторство со најголем број жртви во конфликтот во 2001 година. Албанските бунтовници, на 8 август, околу 9 часот, злосторничкиот чин го извршија од заседа. Во овој крвав настан беа убиени двајца старешини Нане Наумоски (48) - капетан и Сашо Китаноски (40) - поручник, како и резервните припадници на АРМ: Бранко Секулоски (43), Ердован Шабаноски (21), Љубе Грујоски (32), Дарко Велјаноски (27), Марко Деспотоски (28), Веби Рушитоски (27), Горан Миноски (29) и Пеце Секулоски (31).