5 прашања 5 одговори

Не штитам ничии интереси

Чедомир Дамјановски,, член на Комисијата за лустрација

Не можеме да прогласиме некого за соработник на службите, а МВР да има наведено дека не соработувал со нив, вели Чедомир Дамјановски, член на Комисијата за лустрација

Светлана Унковска

Господине Дамјановски, претседателот на Комисијата за лустрација, Томе Аџиев, околу Вашето напуштање на седницата вели дека не знае чии интереси штитите. Кој во Комисијата чии интереси штити?

Точно е дека имаме интереси и нашиот интерес, поточно мојот и на другите двајца, што размислуваа исто со мене, е владеење на правото и согласно со правото да ги донесуваме сите одлуки. Ако е тоа грев, тогаш прифаќаме дека грешиме. Не знам зошто Аџиев вели дека штитиме нечии интереси. Јас кажав, ги штитам интересите на правото и спроведување на законот, а тој нека одговори на јавноста дали ги почитува основните елементи наведени во законот. Односно дека лицето кое ќе го прогласуваме за соработник на поранешните југословенски тајни служби треба да има потпишано изјава за соработка со органите, а самото лице, притоа, вели дека нема такво нешто. Или дека во тоа досие нема наведено дека лицето имало материјална корист, а Аџиев гласа дека тоа лице било соработник. Не можам да сфатам како некого можеме да прогласиме за соработник на службите, а МВР да има наведено дека не соработувал со нив. Тогаш ако е Аџиев толку убеден во спротивното, мора сега тој да му посочи на МВР дека безбедносните служби не знаеле и не биле свесни со кого соработувале или, пак, да поведе постапка против МВР дека ни крие некои информации. Во законот стои дека за прикривање информации треба кривично да одговара, а сега Аџиев нека го направи тоа и како претседател нека си ја изврши функцијата.

Каква е состојбата во Комисијата за лустрација и дали се основани оцените дека процесот на лустрација го губи својот легитимитет?

Состојбите во Комисијата малку се нарушени, особено во однос на прегласувањето по конкретни досиеја. Меѓутоа, мислам дека, сепак, успешно ќе го завршиме процесот. Има мали несогласувања околу прегласувањата, бидејќи секој се држи на своето.

Тројца членови од Комисијата, меѓу кои бевте и Вие, на првото гласање ја напуштивте седницата, зошто потоа се вративте?

Во првото гласање баравме да се одложи оваа точка на разгледување, затоа што уште немаме одговор од органите за таа личност дали кај нив имаат досиеја, дали соработувал или не. Со оглед на тоа дека немаме одговори, баравме да биде одложена седницата додека не ги добиеме тие одговори врз чија основа ги донесуваме одлуките. Бидејќи не прифатија да се одложи, ја напуштивме седницата. И тогаш Комисијата за лустрација немаше кворум, незаконски ја донесоа таа одлука. Претседателот се обиде на мала врата да донесат одлука, која е незаконска во процедурата, бидејќи не е во согласност со член 17 од законот. Ние го известивме за тоа, но брзајќи да му помине одлуката, го викна седмиот член од Комисијата, кој е во гипс со скршена нога, и му испрати кола да го донесат само за да има кворум и да ја донесе оваа одлука. Бидејќи тогаш веќе имаше кворум, беа веќе седуммина членови, се вративме на седницата за да се избориме да ги убедиме дека не можеме да донесеме таква одлука, која не е заснована врз факти во досието.

Како се случува да протекуваат информации и детали од досиејата?

Апсолутно се согласувам. А како протекуваат навистина не знам. Од мене сигурно не е, но сите членови ги знаат досиејата. Исто така, има и еден поширок круг што знаат за досиејата - тоа се и сите оние од органите за безбедност кои на некој начин имаат увид во нив. Не напаѓам некого, туку само кажувам кој е кругот што знае за досиејата. Тоа се сите четири безбедносни органи со кои соработуваме, тука се нивните служби, па и ние 11 членови.

На претседателот на Комисијата одамна му е изминат мандатот. Зошто тој се' уште е на чело на Комисијата?

Тука не ја гледам вината во Аџиев затоа што изборот го врши парламентот и, колку што знам, во тој период немало мнозинство, а претседателот и заменик-претседателот се избираат со двотретинско мнозинство во парламентот. Изјавите од парламентот се дека немало мнозинство, дали било така - не сакам да навлегувам. Во законот стои дека на секои шест месеци претседателот треба да ротира и Комисијата треба да даде извештај за работењето за тој мандат. Сега Благој Гешоски треба да биде претседател на Комисијата за лустрација.