Претходен број

Годинава тешко до кредит, а ќе се топат и минусните салда

Банките на стартот на 2009 веќе почнаа да ги кројат своите нови деловни политики

Соња Маџовска

Годинава поради кризата ќе биде многу тешко да се добие кредит од банка. Дали уште повеќе ќе ни се стопат и минусите на тековните сметки? Одговорот е се' поизвесно потврден. Нема веќе да има ни гледање низ прсти на клиентите. Дури банкарите велат дека ќе се води политика за секој клиент одделно.

Граѓаните уште при крајот на минатата година го почувствуваа затегнувањето на условите при одобрување кредит. Дел од нив се пожалија и дека банките им ги намалија дозволените пречекорувања на тековните сметки, односно на дебитните картички преку кои ја примаат својата плата.

Банкарите сега повторно најавуваат нови заострувања на условите при одобрување кредити, а можно е да дојде и до зголемување на каматите.

Во полн ек се новите пресметки што ги прават банките во почетокот на годинава, особено откако Народна банка на Македонија значително ја заостри монетарната политика. Советот на НБМ не отиде со зголемување на каматите на благајничките записи, но затоа донесе мерки со кои драстично го ограничи кредитирањето. Ако лимитот за кредитниот раст беше 40 отсто, сега тој е симнат на 11,3 отсто на годишна основа за кредити за население. Тоа значи дека ако банките го надминат овој месечен лимит, ќе треба да издвојуваат задолжителен депозит кај НБМ.

Коментарите на банкарите се дека оваа мерка сама по себе се' кажува, па не треба многу да се анализира. Затегната монетарна политика на централната банка води или кон зголемување на каматите или кон големо заострување на условите за одобрување кредит. Нема друго решение, коментираат банкарите. Засега официјално банките ништо не откриваат. Оттаму велат дека поради празниците, се' уште не се утврдени деталните пресметки и поединечните политики на секоја банка. Во земјава се и некои од странските инвеститори кај дел од банките со странски газди, со кои заеднички се кројат новите политики.

Објаснувањето на гувернерот зошто ја затегна монетарната политика е дека на банките им е отежнат пристапот до свежи пари и дека во услови на светска криза, загрижува и високиот кредитен раст кој лан�� отиде над 40 отсто. На крајот од лани почна да паѓа и штедењето, а дел од депозитите и се повлекуваа. Во октомври граѓаните и фирмите од банките и штедилниците повлекоа 40 милиони евра, а во ноември 80 милиони евра. Дел од овие средства повторно се вратија во банките, но банакрите и од НБМ порачуваат дека без штедење нема ниту кредитирање.

Според банкарите, годинава ќе биде тешка, во која и банкарскиот сектор и населението и стопанството ќе мора да се приспособуваат на новонастанатите состојби. Тие на крајот од минатата година најавија дека финансиската криза и влошената економска слика ќе ги принуди да ја сменат кредитната политика за годинава.