Пазарите сигурно нема да се фискализираат
Фискализацијата на трговците на мало на пазарите да се пролонгира до влезот на Македонија во Европската унија, се предвидува во Предлог-законот за измени и дополнувања на Законот за трговија, што вчера го прифати собраниската Комисија за економски прашања и препорача негово второ читање.
Заменик-министерот за економија, Методи Хаџи Васков, во образложението на законот појасни дека од обврската за издавање фискални сметки се изземаат сите трговци на мало на пазарите, освен трговските друштва кои имаат продажни места на пазарите.
Марјанчо Стојанов од опозицискиот СДСМ се изјасни против предложените измени на Законот за трговија, кои ги оцени како реакција на власта по притисокот од пазарџиите и неспособност за одбрана и примена на концепти.
„За да добијат тезга на пазарите, тезгаџиите мора да имаат регистрирано фирма и да купат фискален апарат, што покажува дека проблемот не е решен“, рече Стојанов.
Пратеникот Бесим Догани од опозициската ДПА побара прецизирање на законот и побара од Владата, во услови на светска економска криза, да не ги оптоварува трговците со недоволно дефинирани закони и дополнителни давачки. (А.С.) |
