СТИЛ
Контроверзен дијамантски прстен за новата прва дама на САД
Веста дека Барак Обама нарачал уникатен прстен од 30.000 долари за сопругата Мишел не е примена со одобрување во дел од американската јавност. Информацијата за купување на прстенот, кој италијанскиот дизајнер Џовани Боско ќе го изработи од посебен вид платина - родиум, со дијамантски украси, ја објави лондонскиот „Дејли мејл“ во понеделникот, 1 декември, истиот ден кога САД официјално потврдија дека од крајот на минатата година се во рецесија.
„Њујорк пост“ пишува дека новиот претседател со овој подарок сака да и' се заблагодари на сопругата Мишел за големата поддршка во текот на двете години предизборна кампања. Наводно, Обама им кажал во доверба на пријателите дека на 20 јануари, на претседателската инаугурација во Вашингтон, сака да го види прстенот на раката на Мишел.
На Интернет-порталите се појавија многу реакции на граѓани кои го доживуваат Обама како скромен човек без богатство, со какво што располагаат Бушови, па веруваа дека популистичкиот претседател не е склон кон снобовски дарови и ги провоцираат граѓаните со расфрлање пари во кризни времиња. Веднаш реагираа и портпаролите на Обама, остро демантирајќи ја нарачката на прстенот.
„Приказната не е точна“, порачале кратко. Дизајнерот Џовани Боско најпрвин потврдил дека луѓе на Обама контактирале со неговите агенти во САД и нарачале прстен за Мишел, а ден подоцна неговиот портпарол Енрико Гамба изјавил дека се' се искомплицирало поради написите, па неговиот шеф веќе не сака ништо да коментира за медиумите за нарачката на Обама.
Забележани се коментари во кои Обама го прозиваат зашто накитот не го купил во продавниците во Чикаго, наместо да нарачува прстен од Италија, и тоа од дијаманти и од скапиот метал родиум. Во Јужна Африка годишно се ископуваат 25 тони од тој метал. Во коментарите пишува дека Обама е уште еден елитист во Белата куќа, кој лажно се прикажал како човек со животни навики блиски на т.н. мали луѓе и сиромашните.
|
