БОЈ ЏОРЏ
Внимателен со мажите
Адвокатот на славниот пејач и диџеј Бој Џорџ на неодамнешното судење изјавил дека неговиот клиент го врзал со лисици момчето најмено од агенцијата за придружба, но само за да се заштити од евентуална кражба, а не заради сексуално измачување.
Поранешниот фронтмен на култниот бенд „Калчр клаб“, чие вистинско име е Џорџ Ди Даун, се нашол пред лицето на правдата поради инцидентот што се случил во неговиот стан во Лондон минатата година.
Имено, Бој Џорџ го врзал со лисици 29-годишниот Ајдан Карлсен, кој инаку работел како придружба во една сервис-агенција и за кого се посомневал дека сака да му го украде компјутерот во кој чувал приватни информации.
„Со должна почит, но за Бој Џорџ никако не може да се каже дека е во форма. Од 1980 година има ставено повеќе килограми и едноставно не може ниту да се спореди со Ајдан Карлсен, со што може да се заклучи дека во никој случај не станувало збор за сексуално малтретирање, туку обид да се заштити приватноста на Џорџ“, појаснил адвокатот на пејачот.
Џорџ и Ајдан се запознале преку Интернет-страница што се занимава со давање услуги за придружба на мажи, при што Ајдан се согласил да му позира на Џорџ за износ од 400 фунти. |
