Многу зони околу Штип, ни трага од инвеститори

Поминаа месеци, а не се изгради ниту фабрика ниту се отворија работни места

Иван Бојаџиски

ШТИП - Во околината на Штип има повеќе локации погодни за изградба на фабрики и производствени капацитети, но барем засега се покажа дека тие не се атрактивни за инвеститори.

Во кругот на некогашниот текстилен гигант „Македонка“ се' уште стојат неискористени 130.000 квадратни метри, а беспрекорно уредена локација на 30.000 квадрати чека инвестиции и во приватната индустриска зона на фабриката за акумулатори „Весна Сап“ во Пробиштип.

И како тоа да не беше доволно, па пред повеќе од половина година Владата одреди нова индустриска зона „Три Чешми“. Интересно е што просторот од 206 хектари за чие уредување ќе се потрошат осум милиони евра се наоѓа на само два километра од локацијата на „Македонка“ и на триесетина од „Весна Сап“.

Сечејќи ја црвената панделка, премиерот Никола Груевски во март годинава самозадоволно најави дека во индустриската зона ќе се изграделе 50 фабрики и ќе се вработеле 15.000 луѓе. Премногу убаво за слушање ако навистина се случи тоа. Ама поминаа месеци, а од фабриките, инвестициите и новите работни места нема ни трага ни глас.

Штипската чаршија коментира дека одлуката на државата за нова индустриска зона е неразумна од секаков аспект, а особено од оној финансискиот. Загрижувачки се информациите што ги пренесоа некои локални штипски медиуми, дека во државната каса снемувало пари и дека откако ќе падне првиот снег, ќе се престанело со уредувањето на зоната кај Штип.

Моментно на „Три Чешми“ се гради главната сообраќајница во должина од 2,2 километра. Работите на зоната му беа доверени на скопски „Гранит“ и на струмички „Жикол“, но на градилиштето што го посетивме немаше овластен раководител кој би информирал дали темпото на изградба е според зацртаната динамика. Ако се има предвид големината на локацијата и работите што треба да се завршат – патна инфраструктура, водоводна и електрична инсталација, тешко може да се претпостави дека зоната ќе биде готова до крајот на март идната година.

Инаку, просторот во комбинатот „Македонка“ е на државата и како потенцијал за инвеститорите е ставен на веб-страницата на Дирекцијата за технолошки развојни зони што се нудат во Македонија. Но, местото е прилично руинирано, бидејќи петнаесетина години нема сопственик.

Од друга страна, менаџерскиот тим на „Весна Сап“ применува друга стратегија во промоција на слободните 30.000 квадратни метри во рамките на оваа фабрика во кои евентуалните инвеститори можат веднаш да почнат со својата дејност. Овде свој простор за работа и инвестирање веќе најде хрватската фирма „Стража“.

„Зоната ја промовиравме со доставување материјали до сите странски амбасади во државава. Ги информиравме за поволностите, за капацитетите и за тоа дека оваа индустриска зона е на најконкурентна локација во Европа“, вели Тоше Тошевски, директор на „Весна Сап“.

Странските амбасади се информирани дека оваа приватна индустриска зона има слободен пристап до 650 милиони граѓани на Европа, дека до најголемите европски дестинации производите се транспортираат за најмногу два дена, дека комплексот се протега на 250.000 квадратни метри, дека од регионалниот пат Пробиштип – Штип - Скопје е оддалечена само 20 километри, а од железничката пруга Кочани – Скопје нецели десет километри...

„Информиравме и за слободната конкурентна работна сила во Пробиштип и околината, како и за бруто платата во нашата општина која е со просек од 390 евра. Во информацијата ја ставивме цената на водата и на струјата“, објасни Тошевски.