Саша Огненовски најдобар фудбалер во Азија

Австралиецот со македонско потекло беше повикан од Катанец да дебитира за нашиот тим против Молдавија лани, но немаше македонско државјанство

Сашко Ѓ. Димовски

Австралиецот со македонско потекло, Саша Огненовски (31), дефанзивец на јужнокорејскиот прволигаш, Сеонгам Илхве, е прогласен за најдобар фудбалер на Азија за 2010 година. Во конкуренција на клубови победи неговиот тим, најдобра репрезентација на континентот е Јапонија, а признанието за најдобар азиски тренер заврши кај јапонскиот селектор, Такеши Окада.

„Ова е големо признание за мене меѓутоа мора да бидам искрен и да кажам дека правилата при доделување на оваа награда се контроверзни. Не е фер добитникот да мора да присуствува на прогласувањето, во спротивно испаѓа од конкуренција. Некои фудбалери кои ја заслужија оваа награда токму поради тоа беа изземени од конкуренција“, рече 31 годишниот фудбалер од македонско потекло.

Ова што го рече Огненовски, пред се, се однесуваше на Јапонецот Кеисуке Хонда од ЦСКА Москва, Јужнокореецот Парк Ји Сунг од Манчестер Јунајтед и Австралиецот Тим Кејхил од Евертон кои поради клупски обврски не беа во можност да присуствуваат на свеченоста, па автоматски беа избришани од листата со кандидати.

Саша Огненовски е роден на 3 април во 1979 година во Мелбурн. Игра на позицијата централен дефанзивец и најголем дел од својата фудбалска кариера, до 2009 година, ја мина низ клубови во Австралија (Престон Лајонс, Мелбурн Најтс, Фаукнер Витлс Блус, Квинсленд Роар, Аделаида Јунајтед). Во меѓувреме, една година (2002-2003), настапуваше во Европа, во Панахаики, моментно третолигаш во Грција. Моментно е член на јужнокорејски Сеонгам Илхва, актуелен освојувач на азиска Лига на шампиони, тим за кој досега одигра 60 натпревари и постигна пет гола. Огненовски е капитен на екипата и ги предводеше своите соиграчи до трофејот во ЛШ на Азија по триумфот во финалето над ирански Зоб Ахан со 3:1. Австралиецот со македонско потекло беше стрелец на првиот погодок во мечот за титулата, на крајот беше прогласен за играч на натпреварот, а ја понесе и наградата МВП во натпреварувањето.

Минатата година беше цел на неговиот сегашен клуб, но Аделаида ја одби првичната понуда на Јужнокорејците кои се неговите услуги изразија подготвеност да платат 275.000 австралиски долари (Австралијците бараа - 570.000). Подоцна двата клуба најдоа заеднички јазик по што дојде до реализација на трансферот иако во меѓувреме во трка по Огненовски се впушти и екипата на Сеул.

Огненовски беше и се' уште е во комбинација да ја претставува Австралија. Беше разочаран, откако поранешниот селектор на популарните сокероси Пим Вербек не го повика за квалификациите за Азискиот куп против Индонезија и Кувајт. Неговите желби и сништа се остварија оваа година кога наследникот на Вербек, Холгер Осјек, го повика за пријателскиот меч со Египет во Каиро каде Огненовски дебитира во австралискиот национален тим.

Во 2008 година доби признание за втор најдобар македонски фудбалер во странство по Горан Пандев. Додека беше селектор на Македонија, Среќко Катанец, го повика Огненовски, откако тој изрази подготвеност да дебитира за земјата од која води потекло. Словенечкиот тренерски стручњак сметаше на него за ланскиот пријателски меч со Молдавија на 11 февруари во Анталија, но на крајот беше принуден да се откаже од тогашниот дефанзивец на Аделаида од причина (официјална) што Огненовски не поседуваше м��кедонско државјанство кое, пак, за жал од технички причини не можеше да се обезбеди во кус временски период.