Свветлана Ражњатовиќ - Цеца

Направи хаос во скопскиот дом за деца без родители

Српската турбофолк ѕвезда Светлана Ражњатовиќ-Цеца пристигна во Скопје. Под силно обезбедување и полициска придружба, а по сопствена иницијатива, пејачката вчера напладне го посети Домот за деца без родители „11 Октомври“ во Скопје и на штитениците им подари влезници за претстојните концерти, закажани за вечерва и за утревечер во салата „Борис Трајковски“.

Доаѓањето на Цеца во Домот предизвика вистински хаос - штитениците ја пречекаа во народни носии, со приготвена погача и специјално за неа го испеаја хитот „Громе мој“, па на крајот во еден глас и' порачаа: „Те сакаме Цеца“. Таа не издржа, пушти и некоја солза, а веднаш потоа се скри во една од домските простории каде што даваше изјави за одредени медиуми. Во меѓувреме, почна битката за фотографирање - не се знаеше кој е поамбициозен, дали учителките, дали децата, но сите тие, иако во своја куќа, останаа да чекаат пред влезот на просторијата во која се наоѓаше нивната омилена пејачка. Некои од нив едвај поминаа покрај силното обезбедување, додека другите револтирано се надмудруваа со момците на влезот.

Целата мешаница на крајот ја налути и Цеца, која си замина оставајќи ги со празни раце не само новинарите што чекаа да земат нејзина изјава, туку и упорните дечиња кои со денови се радуваа на посетата, а сега мораа да се спасуваат под налетот на нејзиното обезбедување.