Нема пречки за 13. плата

Со измените во Законот за работни односи се дава можност за исплата на 13. плата, се води сметка за зголемување на заштитата во врска со безбедноста и здравјето при работа, а институтот најниска плата се заменува со минимална плата, се допрецизираат и одредбите што се однесуваат на заштита на работниците за време на бременост, раѓање и родителство и ризични групи, појасни на вчерашната седница на собраниската Комисија за труд и социјална политика, ресорниот заменик-министер Спиро Ристовски.

И од Конфедерацијата на слободни синдикати и од Сојузот на синдикати на Македонија оценија дека измените на овој Закон се добри, поради тоа што со нив за прв пат не се врши рестрикција на работничките права.

Комисијата ги разгледа и законските измени согласно со кои во текот на 2010 и на 2011 година ќе се намалат платите на премиерот, министрите и замениците-министрите, како и на избраните државни функционери за 10 проценти, а се пролонгира и замрзнувањето на платите во јавниот сектор до септември 2012 година. Согласно со измените, а како дел од владините антикризни мерки се и измените на апанажата. Таа ќе биде намалена во однос на досегашното решение, кое обезбедуваше 12-месечна апанажа независно колку време функционерот бил на соодветната функција. Со предлогот се оди на решение со кое ако функционерот бил на функцијата до шест месеци, му следува три месеци апанажа, ако бил меѓу шест и 12 месеци, му следува шест месеци апанажа, ако бил од 12 до 24 месеци, му следува девет месеци апанажа, а ако бил над 24 месеци на функција, ќе добие 12-месечена апанажа. (МИА)