Власта ги скрати дневниците и во приватните фирми

Со новата Уредба, дневниците се сведуваат на 35 отсто, а досега беа 50 проценти

Нина Нинеска-Фиданоска

Во желбата да заштеди и да ги скрати трошоците на административците, односно вработените во државната управа за дневници и за патувања, власта, веројатно, не сакајќи ги скрати и дневниците во приватните фирми.

Познато е дека Владата, со ребалансот на буџетот, кој сега чека одобрување од законодавниот дом, предвиде намалување на трошоците за патувања и за дневници за вработените во министерствата и во другите државни институции.

Тоа е предвидено со Уредбата за измена на Уредбата за издатоците за службени патувања и селидби во странство што на органите на државната управа им се признаваат во тековни трошоци, која веќе е објавена во „Службен весник“, и тоа број 82/10. Уредбата веќе важи од 21 јуни оваа година, а ќе трае до 31 декември 2011 година.

Со овој документ, за вработените во државната управа се предвидува намалување на дневниците од 50 проценти, колку што изнесуваа досега, на 35 отсто, а досегашните дневници од 20 отсто кога патувањето не беше на товар на органот на државната управа, сега се укинуваат и воопшто нема да се исплатуваат.

Но, проблемот е во тоа што иако оваа Уредба се однесува на вработените во државните органи, односно во министерствата, државните фондови и агенции, кон неа ќе мора да се придржуваат и приватните компании!

Тоа, практично, значи дека сега и сите вработени во приватните фирми од земјава кога ќе заминат на пат, нема да добијат дневница од 50 проценти, туку само 35 отсто.

На прашањето зошто е тоа така, сметководителите во приватните фирми ни објаснија дека, едноставно, мора и тие да ги применуваат новите правила, бидејќи во земјава постои единствена Уредба за дневници при патувања, па неа мора да ја почитуваат и државните органи, но и компаниите од приватниот сектор. Доколку, на пример, приватната фирма му исплати на вработениот дневница од 50 отсто, а не 35 како што предвидува новата Уредба, тогаш на разликата од 15 проценти ќе морал да и' плати персонален данок на државата. Тоа, објаснуваат во компаниите, ќе биде дополнителен трошок за оние фирми што имаат повеќе вработени, кои често патуваат и користат дневници.

Сметководителите во компаниите добиле вакво објаснување од консултантски фирми од кои побарале совет како да се однесуваат со новата Уредба, по што им било укажано дека за нив е најдобро и тие да ги прифатат новите правила на игра во државната управа.

Објаснувањето од консултантите е дека одредбите од Уредбата се однесуваат на сите субјекти, односно за субјектите од стопанството, за субјектите од нестопанството и за органите на државната управа, бидејќи согласно со колективните договори и даночните прописи, утврдувањето на дневниците и нивната висина, вклучително и неоданочивата висина, се врши според прописите за органите на државната управа.

А прецизно, со новата Уредба дневницата сега ќе изнесува 35 отсто, наместо досегашните 50 проценти, ако се поднесе сметка за сместување, како и во случаите кога сместувањето не паѓа на товар на органот на управување. Доколку, пак, издатоците за сместување и исхрана не паѓаат на товар на органот, не се исплатува дневница, наспроти досегашните 20 отсто. И трето, ако издатоците за стручно оспособување и усовршување не паѓаат на товар на органот на државната управа, а престојот е над 30 дена, не се исплатува дневница, а досега таа беше 5 отсто.

Вчера се обидовме да добиеме толкување на оваа Уредба и од Министерството за финансии, но не успеавме да воспоставиме контакт со овој ресор.

Досега многу држави применија мерки на штедење во државната управа, но тие никаде не го зафатија и приватниот сектор.