Tоне медиумската слобода

Гана, Костарика, Танзанија... се рангирани подобро од нас во извештајот на „Репортери без граници“

Драстично се намалила медиумската слобода во Македонија, покажа најновиот извештај на организацијата „Репортери без граници“, во кој нашата земја годинава е рангирана на 68. место од вкупно 178 држави во светот. Тоа е двоен пад во споредба со перцепцијата за слободата на медиумите од минатата година,кога Македонија се најде на 34. место, односно се искачи на повисоко ниво од 2008 година кога бевме на 42. место.

Гана, Костарика, Тринидад и Тобаго, Танзанија, Того... се само некои од државите што стојат подобро од Македонија. Годинава првото место го делат европските земји Финска, Исланд, Холандија, Норвешка, Шведска и Швајцарија. На дното на листата, пак, се најде Еритреја, а пред неа се Северна Кореја, Туркменистан, Иран, Бурма, Сирија, Судан, Кина, Јемен и Руанда. За овие држави „Репортери без граници“ наведува дека прогонуваат новинари и дека има целосен недостиг од информации.

Но, и некои држави-членки на ЕУ не можат да се пофалат дека стојат најдобро на планот на слободата на медиумите. Бугарија и Грција годинава, исто така, бележат пад во однос на третманот на медиумите и сега го делат 70. место, а пред нив е Романија. која падна на 52. позиција, додека Италија остана на 49. место, што годинава го дели со Буркина Фасо, а Франција е само пет места погоре.

Од поранешните југословенски републики, зад нас заостануваат Србија, која овој пат падна на 85. место, додека Косово се најде на 92. позиција, но најлоша е перцепцијата за новинарските слободи во Црна Гора, која се пласирала пониско од лани, и тоа на 104. место. Во споредба со Македонија, подобар третман имаат медиумите во Словенија - 46, Босна и Херцеговина - 47 и Хрватска - 62 место.

„Одбраната на слободата на медиумите продолжува да биде битка за будност во демократиите на старата Европа и битка против репресијата и неправдата во тоталитарните режими“, изјави генералниот секретар на „Репортери без граници“, Жан-Франсис Жулиард, при објавувањето на деветтиот извештај на оваа организација. Тој посочува дека е вознемирувачки да се види како некои земји од ЕУ продолжуваат да паѓаат во своите пласмани. „Ако ЕУ не ги престрои своите редови, ризикува губење на позициите на светски лидер во почитувањето на човековите права“, рекол Жулиард. Рангирањето во годинешниов извештај се однесува на ситуацијата меѓу 1 септември 2009 и 1 септември годинава. (А.М.М.)