Поглед

„Јака“ плата

Александрија Стевковска

Дали знаете што може да направите со 63 илјади евра ако случајно ги имате како купче пари? Може да купите станче, добра кола, да инвестирате во некој бизнис! А што би било кога секој месец на вашето конто би легнувале по толку пари?

Тешко е да се замисли, нели, бидејќи повеќето луѓе едвај врзуваат крај со крај. За нив се научна фантастика нулите напишани зад шестката во оваа сума. Но, истатата таа сума не е незамислива за фармацевтот, кој лани секој месец земал плата од неверојатни 63 илјади евра.

И велиме, во Македонија тешко се живее. Каде е тешкотијата во живеењето за овој фармацевт, на кого, очигледно, единствена тешкотија му е да испланира како да ги троши сите тие силни пари. И додека лани сите го ловевме милионерот со 15 милиони евра, сега топ-тема во разговорите е прашањето кој е човекот што со својата заработка во сенка ги фрли сите останати политички и економски муабети што се вртат по кафулињата.

Дали тој произведува и продава или само продава лекови? Дилеми многу, а заклучокот е единствен - лековите станаа доходовен бизнис што носи благосостојба на одредени избрани лица, кои излегуваат од сите просечни рамки за заработка и трошење.

И потоа се прашуваме кој го крева просекот на плата? Додека сите веруваме дека банкарите се „виновни“ што статистика секој месец во просек ни пресметува повисока плати, сега излегува дека зајакот лежи во друга грмушка. Здравствениот сектор и фармацијата истрчаа напред освојувајќи го приматот за најплатена професија.

Очигледно, без леб и без лек не се може, па којзнае, ако некој се вклучи во овој бизинс, можеби наскоро и тој ќе се офајди. Што и да се случи, повеќе од јасно е дека во државава има пари.