Иванов бара помош од Србија за досиејата

Лустрацијата во Македонија не може целосно да се изведе без досиејата во српските архиви

Претседателот Ѓорге Иванов вчера од својот српски колега Борис Тадиќ побара помош за да можат македонските надлежни органи да ги добијат досиејата од белградските архиви што се однесуваат на некогашните соработници на тајните служби. Досиејата што станаа главна политичка тема во Македонија се наметнаа како една од главните теми на вчерашните разговори на Иванов со Тадиќ во Белград за време на првиот ден од официјалната посета на македонскиот претседател.

Бидејќи станува јасно дека лустрацијата во Македонија не може целосно да се изведе без досиејата во српските архиви, Иванов побара во рамките на процесот на сукцесија и преку соодветни процедури да можат да се користат документите што се во Србија.

„Го отворивме прашањето што за нас во Македонија е многу актуелно,  особено во делот од сукцесијата на заедничките архиви за да можат н��шите надлежни институции да се обратат согласно со принципите на сукцесијата до органите во Србија каде што се архивите од заедничката држава“, изјави Иванов по средбата со Тадиќ.

Двајцата претседатели оценија дека односите меѓу Македонија и Србија се добри и пријателски и покрај различните ставови во однос на Косово и нерешениот спор меѓу Македонската и Српската православна црква. За несогласувањата меѓу двете цркви, Тадиќ и Иванов изјавија дека тоа е црковно прашање, но најавија помош во насока на овозможување амбиент за негово разрешување. Создавањето можности за одбележување на 2 Август во манастирот „Св. Прохор Пчински“ е еден главните предуслови за нормален дијалог меѓу двете цркви.

Приоритет на Белград и на Скопје останува европската интеграција и во тој процес меѓусебно ќе си помагаат. „Ќе се залагаме Македонија да добие датум за почеток на преговори со ЕУ, а за Србија да се одблокира апликацијата за кандидатски статус“, истакна Тадиќ.

Двајцата претседатели апелираа македонското национално малцинство во Србија и српското во Македонија, на следните пописи да се изјаснат слободно и да ги поддржуваат во нивните активности за лојалност кон државите во кои живеат, но и почитување на сопствениот идентитет.

Дводневната посета на македонскиот претседател Ѓорге Иванов на Србија почна со официјален пречек пред палатата „Србија“. По средбата со Тадиќ шефот на македонската држава се сретна и со српскиот премиер Мирко Цветковиќ и со претседателката на Народното собрание на Србија, Славица Ѓукиќ-Дејановиќ. (Н.Р.)