„Вујко“ води до врвот на ДУИ

ДПА најави дека на тревните површини на ДУИ во Мала Речица ќе никнат нови компромитирачки материјали

Оливера Војновска

Двроската лустрација што почна во Тетово, најверојатно, нема да заврши само во дворот на тетовскиот професор Шпенд Љуши, туку ќе се прошири на тревните површини пред централата на ДУИ во Мала Речица. ДПА на Мендух Тачи најави ново продолжение со компромитирачки материјали што водат до врвот на ДУИ. Такво нешто може да се насети и од досието „Вујко“ во кое се препозна пратеникот Фазли Велиу, вујко на лидерот на ДУИ, Али Ахмети. Првиот човек на ДУИ, по вчерашната средба со американскиот дипломат, Џејмс Пердју, посредник и еден од креаторите на Рамковниот докумен, (која се одржа во скопскиот ресторан „Национал“) не дозволи други прашања што не се поврзани со состанокот.

Како изгледа досие на еден соработник на специјалните безбедносни служби и што има напишано во него. Архивски број на Сојузниот секретаријат за внатрешни работи, печат, лични податоци, роден во Зајас, псевдоними „Вујко“ и „Дрим“, ознаки „строго доверливо“ и „државна тајна“, изјава за прифаќање соработка со тајната полиција, признаници за примен паричен надомест, извештаи, информации....“ Вакви и уште многу други детали и пикантерии можат да се прочитаат во досието на пратеникот од ДУИ, регистриран за соработник во 1977 година и ангажиран да ги информира службите за дејствувањето на албанските екстремисти во Швајцарија и во Германија.

Досието на пратеникот на ДУИ од Зајас е испипшано на 25 страници и во него може да се прочита дека соработувал заедно со својот внук од сестра, со кого на југословенската тајна полиција и' доставиле многу важни информации.

„Благодарение на кооперативноста на..., Службата стапи во контакт со негов роднина, син на неговата сестра... кој е роден во... година во селото... кај Кичево, СР Македонија. Именуваниот е регистриран во статус соработник во 1980-1981 година, кога по налог на СДБ влезе во екстремните групи во рамките на Универзитетот во Приштина. Од тој период ... и... и' доставија на Службата вкупно 580 значајни информации, податоци, документи, фотографии, како и други безбедносно интересни сознанија“. Во неговото досие уште пишува дека дал особен придонес во пресекувањето на непријателското делување на браќата Јусуф и Бардош Гарвала и Кадри Зека, кои биле убиени во атентат во 1982 година.

Во материјалите се посочени и имиња на сегашни и поранешни видни функционери на ДУИ - пратеници, министри, градоначалници, за кои „Вујко“ заедно со соработникот под псевдоним „Ибар“ доставиле податоци во СДБ. Во неговото богато досие има потврди за парични награди во износ од 2.500 германски марки и 4.500 швајцарски франци.

А во три наврати му била исплатена и апанажа и тоа 5.000, 6.000 и 8.000 германски марки. Во документите е наведено дека СДБ има сознанија дека „Вујко“ бил подготвен „на сите облици на соработка со нашата служба се' со цел да му се обезбедат пари и издавање лажна патна исправа за да може да се среќава со своето семејство во Словенија“.

Во досието на министерот за локална самоуправа, кој пред медиумите самиот откри: „ ’Мама’ - тоа сум јас“, може да се види дека во 1984 година бил регостриран како соработник на тајните служби. Неговото досие има само пет страници, меѓу кои една потврда за примени 40.000 австриски шилинзи и документ од кој може да се прочита дека при рутинска контрола на граничниот премин Јесенице му е пронајден плик со 25.000 швајцарски франци.

Досието под псевдонимот „Стрелец“ се однесува на поранешен пратеник , роден во Дебар, школуван во Школата за резервни офицери во Билеќа, а регистриран за соработник во 1979 година. Тој прифатил да ги информира службите за формирањето на илегални албански одреди и активностите за создавање голема Албанија. Интересно е што во документацијата за „Вујко“ и за „Стрелец“ во повеќе наврати се спомнува „Мама“.

За сето ова дознавме благодарение на професорот Љуши. Тој минатата недела на лустраторите и на новинарите им ги подели досиејата за 65-годишниот пратеник на ДУИ, за министерот „Мама“ и за претседателскиот кандидат „Стрелец“.