ЕДИТОРИЈАЛ

Фалам друг за да те критикувам тебе

Слободанка Јовановска

Напред во минатото, беше пораката што највисокиот функционер на ЕУ, Херман ван Ромпуј, ја доби за време на кратката , неколкучасовна посета на Македонија. Покрај статуите од античка Македонија што ја красат Владата, тој беше пречекан и со автомобилот на Јосип Броз Тито, гест што може да се сфати како посебна чест, но и како политичка порака до Европската унија.

Ова ли е правецот во кој ќе се движи натаму Македонија, во минатото место кон иднината и евроинтеграцијата?

Ван Ромпуј и премиерот Никола Груевски средбата ја овековечија со железни насмевки и учтиво избрани зборови. И така учтиви, тие не скрија дека драматично се разидоа, и дека на барањата на Брисел македонскиот премиер одговори со контрабарања.

Колку се разбраа најдобро посведочи фалбата околу постигнувањата на амбасадорот Ерван Фуере за Македонија, со кои Ромпуј индиректно му порача на премиерот - ние го цениме многу тој што секојдневно ве критикува!

Овој пат премиерот отиде во напад наместо во самоодбрана. Додека Ромпуј бараше да се спроведе Охридскиот договор, Груевски му реплицираше дека токму тоа што Македонија се' уште нема преговори за членство со ЕУ ги загрозува мултиетничноста и мултиконфесионалноста на земјата.

Кога Ромпуј тврдеше дека иднината на Македонија е во евроинтеграцијата и оти таа е сидро за македонското мултиетничко општество, премиерот оцени дека без Македонија во ЕУ под прашалник ќе бидат мирот, безбедноста и регионалната стабилност.

Кога Ромпуј побара да не ја пропуштиме можноста и да го решиме спорот околу името на државата, Груевски побара да ја искористи политичката моќ што ја има и со белгиското претседателство да го олесни спроведувањето на препораката на ЕК за почнување преговори со Македонија.

Поедноставно, додека еврофункционерот ни порача дека не' чекаат и оти не ни ја затвораат вратата за ЕУ, премиерот му стави јасно до знаење дека чекаме и ние, ама не само да ни ја отвори, туку и да не' поттурне внатре.

Тоа што го слуша јавноста во Македонија со недели, сепак, не било спомнато официјално од македонска страна во разговорите.

Премиерот не се повикал на референцата која сега стана дипломатска мода во Скопје, бидејќи, според оцени од ЕУ, многу добро знаел дека таа не поминува во Брисел. Ромпуј отиде чекор понапред во дефинирањето на позицијата на Унијата, изјавувајќи дека ЕУ не е дел од преговарачкиот процес околу името, или поточно околу пазарењето за излез од грчкото вето, кое стана главна тема во земјава. Иако, главниот проблем за напредокот на Македонија е токму во блокадите во Европската унија

Од она што го зборуваше премиерот, исто така, јасно е дека препораката на Европската комисија за преговори добиена минатата година тој ја смета како завршена работа. Дека таа важи и натаму и не очекува да се проблематизира, иако Белгијанецот не само што ги повтори старите области во кои не се задоволувачки реформите, туку додаде и нова - слобода на медиумите.

Сите овие области се ’рбетот на владината внатрешна политика, па и политичка филозофија, на која упорно работи сите четири години, па макар биле на штета на државата. Да се има независно или зависно судство не е реформа, туку е прашање на демократија или не, да се партизира администрацијата место да се професионализира не е прашање на добра волја, туку на нужност.

За Охридскиот договор одамна е кажано се', а тоа во кој правец оди слободата на медиумите во 2010 година најубаво објаснува фамозниот гест со „мерцедесот“ на Тито.