Пукна кавга во Уставен суд

Судијата Зоран Сулејманов демонстративно ја напушти седницата

Гордана Дувњак


Судијата Зоран Сулејманов вчера демонстративно ја напушти седницата на Уставниот суд по жестоката вербална расправија што се случи при утврдувањето на дневниот ред. Кулминацијата беше достигната кога Сулејманов му рече на претседателот на Судот, Трендафил Ивановски, дека му е „драго што за две недели ќе ја напушти претседателската функција“. На ваквата провокација, Ивановски возврати дека му посакува тој да седне на жешкото место - претседател на Уставниот суд.

Инцидентот се случи откако судијата Сулејманов побара да се одложи расправата на две точки од дневниот ред: за одредби од Законот за електронски комуникации, како и за Законот за денационализација. Тој смета дека подготовките не биле добро извршени, бидејќи не биле понудени компаративни искуства и оти во отсуство на еден судија, непотребно се брзало со важни прашања. Ваквите тврдења ги негираше суд��јата Игор Спировски, кој е судија известител за двата предмета. Тој кажа дека тоа не е вистина и го обвини Сулејманов дека тој намерно го одолжува реферирањето околу Законот за следење на комуникации, кој не го става на дневен ред цела година. Тоновите станаа високи по барањето на Сулејманов да се гласа за неговиот предлог и расправијата околу тоа кој имал или немал право да зборува.

Претседателот на Уставниот суд, Трендафил Ивановски, вчера ни потврди дека не е прв пат да има вакви искричења со споменатиот судија, но вели дека не сака да верува дека намерата на Сулејманов била да се предизвика инцидент поради негова лична дискредитација.

Судијата Игор Спировски, пак, не сакаше ни да го коментира вчерашниот настан и само кажа дека јавно искажал мислење дека не гледа причина за одложување на овие точки, бидејќи смета дека не' држат аргументите на судијата, кој самиот чува предмет повеќе од една година.

Судијата Зоран Сулејманов во изјавата за нашиот весник вели дека немал намера да навреди никого, за никого не кажал дека е кодош или некоја слична навреда, туку само остро реагирал затоа што му било прекршено неговото деловничко право.

„Прв пат се случува на еден судија да му биде одземено правото да зборува и да не се дозволи да се гласа за неговиот предлог. Претседателот или е толку видовит, па знае што ќе кажам или, пак, се прави кабадаија, па по паметот на другите, намерно ме провоцира за да не учествувам во расправата, за која имам што да кажам бидејќи сум единствен кривичар во Судот“, додава судијата Сулејманов, кој се сомнева дека некои точки се ставаат на дневен ред по експресна постапка.

Вели дека не крие оти едвај чека да заврши мандатот на актуелниот прв човек, Ивановски и оти не е во добри односи ни со претходната претседателка Лилјана Ингилизова, но тоа не било причина намерно да предизвика инцидент. „Имам уште 1,5 години до крајот на мандатот и немам никакви амбиции за претседател“, потенцира Сулејманов. Тој признава дека предметот околу одредбите од Законот за следење на комуникации го чува повеќе од една година, но затоа што бил „сложен и имало тешки манипулации“ околу него.

По напуштањето на седницата, расправата продолжи и беше поведена постапка за одредбите од Законот за електронски комуникации.