„Њујорк тајмс“ предвреме ќе се раздолжи

Њујорк - Американскиот дневен весник „Њујорк тајмс“ соопшти дека до 2012, три години пред рокот, има намера да го врати заемот од 250 милиони долари, што го зема од мексиканскиот милијардер Карлос Слим. „Њујорк тајмс“ зеде кредит во 2009 од Слим, како најбогат човек во светот, под исклучително висока камата од 14 отсто и потенцијално многу вредна гаранција во акции, пренесоа американските медиуми. Весникот соопшти дека Слим е сопственик на еден од најголемите поединечни удели во компанијата, не сметајќи ги сопствениците - семејството Салцбергер.

Кредитот од Слим во јануари 2009 му помогна на „Њујорк тајмс“ да се одбрани од економската криза, која влијаеше на драстичниот пад на приходите од огласување во целиот сектор на печатени медиуми. „Во изминатите две години, компанијата ’Тајмс‘ ги намали своите долгови од 1,1 милијарда долари на 670 милиони долари“, изјави портпаролот Роберт Кристи. „Тајмс“ во јули годинава оствари раст на приходите, прв пат од 2007, при што растот на приходите од реклами во дигиталниот формат го неутрализира падот на приходите од огласи во печатеното издание. (МИА)