„Алкалоид“ додели уште 40 стипендии

Фармацевтската компанија „Алкалоид“, по четврти пат ги додели стипендиите „Трајче Мукаетов“. И годинава фондацијата одобри и додели 40 стипендии, и тоа 18 стипендии на студенти по фармација и 22 стипендии на студенти по медицина. За првпат беа доделени и награди за најуспешниот дипломиран фармацевт и лекар. Како првенци на генерација, Анела Тосевска и Андреј Кралев, добија еднократната парична награда во вредност од 1.000 евра.

Ваучерите на наградените им ги врачи генералниот директор на „Алкалоид“, Живко Мукаетов. „Најдобриот студент по фармација е и наш стипендист, што е доказ дека стипендиите одат во вистински раце“, рече Мукаетов.

И годинава „Алкалоид“ ќе вработени дел од стипендистите. Лани беа вработени четворица. „Досега имаше 53 нови вработувања. За два месеца се планира бројот на нови вработувања да се заокружи на 65, од кои половината од нововработените ќе бидат стипендистите“, додаде Мукаетов. Преку фондацијата формирана во чест на Трајче Мукаетов, кој долги години го развиваше „Алкалоид“, досега се доделени вкупно 142 стипендии. Стипендијата изнесува 6.500 денари месечно и се доделува 12 месеци. Имињата на добитниците ќе бидат објавени в петок во дневните весници. (Ј.Ј.)