И без царина, новите коли нема да поевтинат

Укинувањето на царините за возила по потекло од ЕУ што настанува благодарение на Договорот за стабилизација и асоцијација со ЕУ, а не како резултат на добрата волја на Владата да го поевтини увозот, нема да влијае врз падот на цените на возилата.

Според дел од импортерите со кои контактиравме, станува збор за минимално намалување на царината, кое воопшто нема да влијае врз крајните цени.

„Укинувањето на царините за увоз на автомобили од ЕУ нема воопшто да ги намали продажните цени на коли во автосалоните, од проста причина што станува збор за минимален пад на царините, кои и сега немаат многу голем удел во крајните цени“, информираат до „Еуроимпекс“, застапници на брендот „Пежо“.

Инаку, околу укинувањето на царината за возилата вчера реагираа и партиите.Опозицискиот СДСМ смета дека присвојува проекти што се дел од меѓународни договори кои Македонија ги потпишала пред речиси десетина години. „Лицемерно е владејачката партија да поздравува укинување царини за возила од ЕУ од две причини. Прво, затоа што ова е дел од обврската која произлегува од Договорот за стабилизација и асоцијација потпишан со ЕУ во 2001 година, каде што е предвидено да се намалуваат царините за сите увозни стоки. А второ, постојната стапка за овие автомобили е 1 процент, а од јануари 2011 година ќе биде 0 проценти, што претставува незначително намаление“, се вели во реакцијата на СДСМ.

ВМРО-ДПМНЕ, пак, ја поддржува иницијативата за бесцарински увоз на возила од ЕУ и смета дека тоа е заслуга на оваа Влада.

„Со ваквата мерка се постигнува и се нуди општо намалување на цените на увоз, и за старите и за новите возила. Ова се мерки што се од исклучителен интерес на граѓаните. Со мерката за нула проценти царина за увозот на возила од ЕУ се очекува дополнително подновување на возниот парк во државава“, истакна вчера на прес-конференција пратеникот Крсто Муковски. Тој посети и на измените на Законот за акцизи со кои, како што рече, се овозможило поголемиот број граѓани да дојдат до ново или до половно возило по поволни цени. „Во изминатите месеци, откако беа донесени мерките на Владата, вкупно се увезени 51.225 возила, од кои 5.480 се нови, а 45.745 употребувани. Тоа значи дека над 50.000 граѓани, односно над 50.000 семејства во земјава им се овозможи да купат возило. Вкупниот увоз на возила е зголемен за четири пати, а кај половните за дури 15 пати. Нето-ефектите во буџетот изнесуваат 11милиони евра“, смета Муковски. (А.С. - С.М.)