Претходен број

Македонец уби четворица во кафеана во Чешка

Скопјанец упаднал на забава и ја убил поранешната девојка, нејзиниот маж и нејзините родители

Љубоморен Македонец застрелал четири лица во кафеана во Чешка. Според првичните информации, 42-годишниот скопјанец упаднал на фамилијарната забава на која имало голем број гости во ресторан во Петрвалд. Веднаш ја застрелал својата поранешна девојка, а ги убил и нејзините родители, како и нејзиниот триесетгодишен сопруг. Убиството кое се случило во саботата навечер ја шокираше чешката јавност, а медиумите опширно известуваат за настанот што се случил во местото Петрвалд, на истокот на земјата.

Иако медиумите првично шпекулираа дека станува збор за државјанин на Македонија, Албанија или од Црна Гора, од македонскиот конзулат во Чешка потврдуваат дека станува збор за нашинец, по потекло од Скопје.

Како што пренесуваат чешките медиуми, повикувајќи се на портпаролката на полицијата, Сона Стетинска, убиецот по грозоморниот чин се обидел да се самоуби, пукајќи си во главата. Поради сериозните повреди, тој е хоспитализиран во локалната болница и неговата здравствена состојба е критична.

Трагедијата се случила по полноќ, околу 1,30 часот, кога скопјанецот, најверојатно, поради љубомора, влетал на прославата на која имало десетина гости и почнал неконтролирано да пука. Меѓу гостите, според чешките весници, имало и двегодишни деца, кои, за среќа, не се повредени од неконтролираното рафално пукање.

Притоа, убиецот ја погодил 25-годишната жена, која порано му била девојка, а на самото место ги усмртил и нејзините родители на возраст од 47 и 50 години. Полицијата зела примероци од неговата крв за да провери дали бил под дејство на алкохол. Иако се претпоставува дека станува збор за убиство од љубомора, полициски извори изјавиле дека ќе биде неопходно прво да се сослушаат напаѓачот и очевидците, што во овој момент било невозможно поради вознемиреноста и лошата психичка состојба на сите што присуствувале на прославата. (Д.Т.)