Претходен број

Оваа гранка носи девизен прилив од 5 до 6 милиони евра годишно

Александрија Стевковска


Кризата ја погоди и штипска „Баргала“, која вработува околу 1.200 луѓе од Штипско. Таму веќе прават калкулации за помали плати, а половина од вработените се пуштени на годишен одмор. Неизвесно е кога и дали воопшто ќе се вратат на работните места. Постои можност и дел од другите 600 вработени да бидат пуштени дома ако не пристигнат нови нарачки за производство на обувки за сезоната есен-зима.

Најголемиот страв доаѓа од помислата дека со евентуално застанување на производството од еден месец фабриката не ќе може да се врати во нормала една година. Се прогнозира дека овој месец е критичен затоа што ќе се разбистрат работите околу нови нарачки.

Со негативните движења во текстилната и чевларската индустрија, на луѓето од Штипскиот регион не им останува ништо друго, освен да чекаат и да видат дали ќе бидат следни на листите за отпуштање или, пак, ќе им бидат скастрени платите.

„Засега немаме никакви нарачки за работа. Се' уште на нашите партнери не им се дефинирани потребните количини. Досега беше практика до крајот на февруари да има нарачки, а сега не е така. Сите чекаат да видат како ќе се одвива ситуацијата, бидејќи потрошувачката е многу намалена. Така, ако порано имало нарачки за 1.000 или 10.000 пара обувки, сега бројот е преполовен. Имено, во февруари-март доаѓаа нарачки за есен-зима колекцијата, а во меѓупериодот се надополнуваше асортиманот на модели“, вели Катерина Барзова од „Баргала“. Според неа, „Баргала“ не може да избега од општите негативни трендови, кои ја зафатија чевларската индустрија во земјава.

„Кумановските чевлари веќе работат со 80 отсто помал капацитет, поради застанатите нарачки за чевли. Не можеме да останеме надвор од тие случувања“, вели Барзов��. Тоа дека потрошувачите се се' повнимателни и се' поретко купуваат, Барзова се уверила и самата при посетата на европските земји.

„Порано кога одев во Италија или во Германија, продавниците беа преполни. Сега се празни. Нема продажба. Европејците се исплашени, штедат, а тоа се одразува и врз нас, односно предизвикува недостиг од нарачки за работа“, додава Барзова.
Според извршниот директор во „Баргала“, Благој Донев, тежината на слабиот промет трговците ја префрлаат врз производителите, обидувајќи се да ја намалат производната цена. Тоа ги става во шах-мат позиција и немаат друг избор освен самите да ги редуцираат трошоците, преку намалување на платите. Но, менаџментот нема голем простор за маневри.

„Токму затоа во вакви времиња Владата е таа која може да и' помогне на чевларската индустрија, бидејќи се работи за гранка која носи девизен прилив од пет до шест милиони евра годишно. Знаеме дека доаѓаат избори и дека се приоритет. Но, не може да се занемари економијата, која е крвотокот на општеството. Најдоцна по изборите Владата треба сериозно да се зафати со санирање на состојбите во стопанството, посебно во трудоинтензивните гранки, како што се текстилот и чевларската индустрија“, препорачува Донев. Тој смета дека е неопходно државата да ги стави на инфузија овие гранки, а за да се постигне тоа, треба да се искористат инструментите кои стојат на располагање.

„Владата може да помогне во делот на давање на тендерите за набавка на опрема на домашни фирми, бидејќи секоја земја го штити своето производство. Кај нас, пак, на тендерите постојано се протежираат странските фирми, што му носи само штета на нашето стопанство. Владата може да се најде и во делот на одложено плаќање на придонесите за неколку месеци, инаку не можеме да опстанеме. Еден од поголемите удари овој период е токму реформата цела плата, која не' присилува до средината на месецот да исплаќаме плати, што ретко кој може да го постигне. Секое доцнење се казнува со пресметки на камати, што дополнително финансиски го оптоварува нашето работење“, објаснува Донев.