Претходен број

Поглед

Згазено достоинство

Жаклина Хаџи Зафирова

Кое достоинство го имаат нашите професионални војници кога, притиснати од закани, очајнички се обидуваат да стигнат до власта додека од другата страна нема кој да ги слушне за да им се реши статусот?

Тажна е сликата на војниците што протестираат со војнички марш. Тие молат пред Владата и пред Собранието за да ги згрижат поради нивниот несебичен влог за државата чии бои ги бранат. А, таа, државата, возвраќа со немање слух и со целосно игнорирање, како воопшто да не постојат, газејќи го нивното достоинство.

Веќе два пати досега професионалните војници, обединети од здружението „Достоинство“, го искажуваат револтот и незадоволството од законското решение, според кое со навршени 38 години би требало да останат на улица. Затоа апелираа до институциите и до одговорните. Се чини залудно.

Никој од надлежните не се покажа доволно доблесен да ги слушне нивните барања, па ако ништо друго, да им вети дека ќе се разговара за нивниот проблем. Дури и армискиот Синдикат им го сврте грбот наместо да застане во одбрана на своите колеги-професионалци, чии права по дефиниција би требало да ги застапуваат. Притоа, ги предупреди своите членови на „опасноста“ да излезат на протест, а истовремено ги повика на „мудрост и внимателност“!

Војниците порачаа дека нема друга алтернатива и дека ќе се обратат до НАТО. Таа адреса за нив станува опција. Затоа што сфатија дека сите се прават глуви и не сакаат да ги ислушаат нивните маки. Војниците се надеваат дека ако не сака никој да им помогне од дома, тогаш можеби ќе наидат на разбирање кај оние што ги наградуваат со ордени и признанија додека се борат под македонското знаме кое со гордост го покажуваат секаде. Барем таму надвор знаат да ја ценат храброста и способноста.