Претходен број

Владата со црвени панделки во изборна кампања

Премиерот со изградба и обнова на патишта и објекти ќе и' помага на својата партија за изборите

Соња Крамарска

Скопското предградие Пинтија завчера беше домаќин на гости од највисок политички профил. Премиерот Никола Груевски, придружуван од сегашниот градоначалник од ВМРО-ДПМНЕ на Кисела Вода, Џорџе Арсов, и кандидатот за иден градоначалник, Марјан Ѓорчев, како и кандидатот за скопски градоначалник, Коце Трајановски, фрли неколку лопати песок во камен-темелник на нов водовод. На лопатата светкаше црвена панделка како од времето на инвестициите на некогашниот вицепремиер Васил Тупурковски, а целиот настан беше проследен со пригодна културно-уметничка програма.

Визитата на високите владино-партиски гости на една од скопските населби не може да се одвои од она што моментно се одвива пред очите на целата домашна јавност, трката за освојување на градоначалнички места во државата и за највисоката функција претседател на Македонија.

Премиерот Никола Груевски еуфорично најави бројни инфраструктурни проекти, чиј почеток, како и што самиот откри, ќе го гледаме практично секој ден, веројатно додека трае дваесетдневната кампања за претседателските и за локалните избори.

Доизградба на патната инфраструктура на коридорите 8 и 10, изградба и санација на 16 патни делници, реконструкција на локални и регионални патишта и изградба на станбени згради. Толкав е пакетот на владини инвестиции кои се вметнуваат во игра во оваа предизборна кампања. Премиерот Груевски тврди дека 120 милиони евра веќе се обезбедени во вид на заеми од финансиски институции (во време на криза и на заострување на условите за кредитирање), а 24 милиони евра ќе се издвојат од буџетот. Проектите, вели, ќе стартуваат од април годинава.

Фактот што оваа засилена активност на Владата се случу��а во ударниот период на изборната кампања остава непријатно чувство дека врвот на владејачката партија ВМРО-ДПМНЕ ги пушта во погон сите ресурси за придобивање на симпатиите на избирачите. Самиот Груевски во изјава за медиумите, не сакајќи практично да даде потврда дека мобилноста на владиниот кабинет е тесно поврзана со предизборието.

„Уште во овие две недели започнуваме пет проекти на градење патишта. Го започнавме патот за Поречје, ја почнуваме и главната делница меѓу Радовиш и Струмица, го почнуваме патот за Кожуф, патот Банско - Куклиш, се' во овие две недели“, вели Груевски, прецизирајќи дека „меѓу првиот и вториот круг на гласање“ Владата ќе започне 11 реконструкции на патишта.

Со „трудбеничката акција“, која ќе достигне сума од над 100-ина милиони евра, ќе бидат опфатени и поправки, доградби и целосни изградби на зградите на Уставниот суд, Македонската филхармонија, парламентот. Ако може да им се верува на најавите, следните две седмици Македонија би можело да се претвори во едно големо градилиште. На една страна ќе се подобрува инфраструктурната слика на нашата земја, а на друга страна ќе се ѕида невидливата кула од рејтинг на владејачката партија и нејзините кандидати за градоначалници и за претседател.

Вметнувањето на црвените трудбенички панделки во игра не се новитет на Владата на премиерот Никола Груевски. Речиси сите досегашни влади ги користеа механизмите што им се на располагање за да ги подобрат своите позиции во период на избори. Попусто се носеа закони против такви појави затоа што практично не постои закон што може да и' забрани на влада да ги запре своите активности во време на избори. Тоа е прашање на политичка етика, но таа е одамна изгубена на овие простори.