Поглед

Лобист за една употреба

Слободанка Јовановска

Како една бесцелна дебата може да стане политичка тема, се виде неделава од третманот на европарламентарецот Бернард Поселт, кој доживеа класична партиска злоупотреба од тие што го донесоа овде како „пријател и голем лобист за Македонија“.

Откако го инструираа да потврди дека во 1995 година функционерите на СДСМ одбиле членство во НАТО и започнување преговори со ЕУ под референцата БЈРМ, владини преставници вчера ги „бранеа“ угледот и честа на германскиот европарламентарец препознавајќи го само него во описот „ноторен лажго и тотален идиот“.

Зошто во инаку непримерните „комплименти“ на Бранко Црвенковски не го препознаа претседателот на државата, Ѓорге Иванов, кој ја почна оваа кич-расправа и доби шлаканица од европарламентарката Дорис Пак, бидејќи ја прочита неговата намера? Зошто во него не се препознаа ни Васко Наумовски ни Антонио Милошоски, кога е сосема очигледно дека нивните политички мегафони ја туркаат оваа небулоза веќе втора недела?

Иако Поселт си ги заслужи навредите прифаќајќи да биде актер во проѕирна политичка манипулација, прашање е со каков образ ќе и' се обраќа во иднина на јавноста во Македонија, кога и на тие што сакаше да им помогне, само политички го искористија.

Иако Поселт не е влијателна политичка фигура во Европскиот парламент и на скалилата на заслугите не може да се мери со Зоран Талер, Јелко Кацин, Дорис Пак, па и со Јогрос Шацимаркакис, недолично е да се злоупотребуваат за внатрешна кавга оние што можат да се избројат на прсти - а треба да и' помогнат на Македонија во Брисел.