Македонец упаднал во куќата на Јованка Броз во Белград
По апсењето, Перо Давидовски (43) рекол дека им е син на Тито и на Јованка Броз Скопјанецот Перо Давидовски (43) упаднал во куќата на Јованка Броз, прескокнувајќи ја оградата на куќата во белградската улица „Кнез Александар Караѓорѓевиќ“, каде што живее вдовицата на Тито. Инцидентот се случил во вторникот, околу 11 часот, по што еден од соседите го забележал Давидовски и ги предупредил полицајците што го чуваат нивниот прв сосед - политичарот Чедомир Јовановиќ. Полицајците влегле во дворот, го совладале Давидовски и го однеле во полициска станица, објавија вчера медиумите во поранешна Југославија.
На испитувањето Македонецот рекол оти им е син на покојниот Јосип Броз и на Јованка и дека се обидел да дојде до „мајка си“ и од неа да добие „позитивна енергија“. Судот за прекршоци во Белград му одредил екстрадиција и издадена му е забрана за влез во Србија во траење од една година.
Српскиот министер за труд и социјални работи, Расим Љаиќ, соопшти дека станува збор за психички нестабилна личност и додаде дека му го пронашле пасошот од каде што можело да се види дека постојано патувал, дури бил и на аџилак во Ерусалим. Љаиќ, кој изминативе години се грижеше за сопругата на маршалот, по инцидентот ја посети во вилата. Таа му рекла дека не е потресена, бидејќи била навикната да ја вознемируваат непознати луѓе.
„Не е ова првпат некој да ја прескокне оградата од куќата на Јованка Броз. Некои ја прескокнуваат од љубопитност, други за да се фотографираат до вдовицата на Тито, трети само за да ја видат одблизу“, објасни министерот Љаиќ. Српската влада одлучи да го финансира реновирањето на руинираната куќа за да и' го олеснат животот на Јованка, а неодамна и го дадоа и првиот пасош по смртта на Тито. (Х.Р.)
|
