Во поплави во Истанбул загинаа 23 лица

Поплавени се куќи, патиштата, а седум жени вчера се удавија во минибус на пат кон работа

ИСТАНБУЛ – Дваесет и три лица загинаа од поплавите што го зафатија турскиот град Истанбул, при што беа поплавени куќи, патиштата беа претворени во реки, а седум жени вчера се удавија во минибус што ги носеше на работа. Воени хеликоптери ги надлетуваа квартовите на европската страна на најголемиот град во Турција, што делумно се поплавени од најобилните дождови за 80 години. Луѓето стоеја на покривите на куќите и на возилата, чекајќи да бидат спасени.

Турската телевизија Си-Ен-Ен прикажа снимки на покриените тела на загинатите, пронајдени во населбата Халкали, во близина на меѓународниот аеродром „Ататурк“. Официјални претставници на аеродромот јавија дека летовите не биле прекинати. Гувернерот на Истанбул, Муамер Ѓулер, за турската телевизија Си-Ен-Ен изјави дека 23 лица загинале во областа Истанбул во последните два дена. Спасувачките екипи поставуваа штици и скали за да им помогнат на возачите на автомобилите и на камионите, заглавени во надојдените води, безбедно да пристигнат до мостовите и до повисоките делови. Во комерцијалниот кварт Икители, жителите се туркаа среде остатоците од канцелариска опрема. „Мојот пријател заглави во камион, откако водата надојде одеднаш. Возилото престана да работи, бидејќи се наполни со вода. Го спасивме со дигалка“, рече Ќамил Чоскун од квартот Икители, за телевизијата Ројтерс.

Али Ердем, главен аналитичар во Метеоролошкиот завод во Истанбул, јави дека врнежите од вторникот се најобилни во последните 80 години. Телата на седум жени вчера беа пронајдени во работничката населба Багчилар во Истанбул. Тие се удавиле во минибус што ги превезувал на работните места во текстилна фабрика, јави новинската агенција Анадолија.

Најтешко погоден од поплавите е западниот дел на градот, на европската страна. Истанбул е сместен на стрмните брегови на Босфорската Теснина, еден од најпрометните водени патишта во светот и голем канал за товарни бродови и нафтени танкери од Црно Море.

На други места во северозападна Турција уништени се два моста од надојдените води на патот Бахчекој-Сарај. Државната новинска агенција Анадолија вчера јави дека спасувачките екипи извлекле вкупно 23 тела за два дена од поплавите во северозападна Турција. (Ројтерс)