Кошарка

За 10 минути Хрватите ни го урнаа сонот за два бода во втората фаза

Македонските кошаркари прокоцкаа водството од 17 коша од 15 минута и на крајот загубија со 71:81

Од нашиот известувач
Наум Котевски

Ни фалеше дрскост, храброст, и секако памет па ова да биде втора вечер од ханскристијановите бајки за македонската кошаркарска репрезентација, овде во Арената во Познањ. Додека од трибините се ореше песна од македонските навивачи кошаркарите пропуштија голема шанса по вчерашната победа над Изреал да ја совладаме фаворизираната Хрватска во битката за вредните два бода кои сакавме да ги пренесеме во втората фаза и новоформирната група во Бигдош.

Имено, по импресивното прво полувреме во кое ја врзавме Хрватска за радијатор, правејќи и плус од фантастични 17 коша во 15 минута и 14 на полувремето, следеше катастрофален пад во вториот дел во кој не игравме практично ништо, а Хрватите како духови влегуваа во рекет и се извлекуваа на шут доаѓајќи до победа од 81:71.

Нивната серија од 12:0 на стартот од третата четвртина за топење на нашата предност на само два поена разлика ја врати насмевката на лицата на хрватските навивачи и новинари, кои во првиот дел си удираа шега на своја сметка: ""Ги нема Бурисис, го нема Спанулис, но ги има сите Македонци кои можат да даат тројка", викна еден хрватски колега од своето место. И беше во право, во тоа незаборавно полувреме нашата бековска линија играше одлично и благодарејќи на Врбица и на Ристе Стефанов, како и на Соколов имавме 5/8 за три на крајот од првата четвртина и 9/20 на полувремето. Згора на тоа по 10 минути го смрзнавме на нула најдобриот хрватски кошаркар, од оваа сезона бек на Милвоки, Роко Лени Укиќ, кој својот прв кош го даде во 16 минута.

Таа чиста слика за нас за кратко време се замагали. Третата четвртина Хрватите ја завршија со минус пет, а во последната ни го раскажаа филмот. Кошаркарот на ЦСКА Москва Зоран Планиниќ беше креаторот на пресвртот. Влегуваше лесно покрај Гечевски, положуваше, му играше со грб, го ротираше, а и асистираше. Покрај него некако најконстантен кај Хрватите во текот на целиот натпревар беше Вујчиќ, кој на крајот заврши со 12 коша. Ако, Хрватите во првиот дел имаа проблем со пик играта, а ние со две додавања имавме отворен шут, во вторите 20 минути приказната беше сосема различна. Хрватите поентираа, а ние се нервиравме. Арсиќ доби и техничка грешка во последната четвртина. Таа негова грешка не е битна, но битна е очигледната психолошка грешка, кај целиот тим. Таа мора да се поправи во мечевите со Германија, Русија и Франција во Бигдош.

Македонија - Хрватска 81:71 (48:34 полувреме)

Сала: Арена во Познањ, гледачи:1000, судии. Долинек (Чешка), Херезуело (Шпанија), Празак (Чешка)

Македонија:Стефанов 12, Мираковски, Соколов 12, Р.Стефанов 11, В.Стојановски 7, Блажевски, Тасовски 2, Гечевски 8, Антиќ 7, Д.Стојановски 12, Мејси 12, Самарџиски.

Хрватска: Укиќ 7, Кус 8, Поповиќ 7, Вујчиќ 12, Пркачин 9, Розиќ 7, Планиниќ 9, Стојиќ 2, Лончар 1, Баниќ 11, Ничевиќ 8, Касун.