Поглед

Ден за жалост

Соња Крамарска

Македонија е единствената држава што покрај Русија каде што се случи авионската несреќа и ЕУ, чија членка е Полска, прогласи ден на жалост за трагично загинатиот претседател Лех Качињски и за другите членови на делегацијата што патуваа кон рускиот град Смоленск.

Претседателот Лех Качињски и земјата што ја предводеше, Полска, се големи пријатели и поддржувачи на Македонија и како такви заслужуваат најголема почит. Покрај тоа, во Полска има најмногу лекторати за изучување на македонскиот јазик и култура. Значи, станува збор за земја-амбасадор во ширењето на националната посебност на македонскиот народ.

Меѓутоа, прогласувањето ден на жалост кон настан што се случил во друга земја е, исто така, и чин што спаѓа во доменот на водење државна политика. И затоа секој таков потег треба да биде одмерен и да содржи во себе некоја поента. Што се вели, да го измериме и неговото политичко значење.

Која е поентата на Македонија во прогласувањето ден на жалост цела седмица по настанот крај Смоленск и каква е пораката што нашето раководство сака да ја испрати до домашната и до меѓународната јавност со овој чин? И дали е тој плод на некакви одложени анализи што се направени седум дена по паѓањето на претседателскиот авион.

Да, можеби, затоа што во моментите кога очите на светската јавност беа вперени кон Полска и кон местото на трагедијата – Смоленск, и кога се пребројуваа жртвите на несреќата и се подготвуваше списокот за идентификација на телата, македонската Влада држеше отворена седница. Ја одработуваше третата фаза од својата маркетиншка стратегија.

Изгледа од политичкиот маркетинг на нашата Влада - никој не е поштеден.