Полицаец принудувал две девојчиња на проституција

Седум макроа ги малтретирале девојчињата, а шеф им бил полицаец од обезбедувањето на амбасадите

Седумчлена група четири дена сексуално малтретирала две малолетни девојчиња, кои биле продавани на клиенти во Гостивар за сума од 2.000 до 8.000 денари. Организатор на групата е полицаец, по потекло од Велес, кој работел како надворешно обезбедување на дипломатско-конзуларните претставништва во земјава. Кошмарот на девојчињата, кои се на возраст од 16 и 17 години, започнал минатата недела кога биле намамени од таксист и потоа вплеткани во мрежата на трговија со малолетнички. Насилниците ги принудувале да се проституираат со денови за цена од 2.000 до 8.000 денари.

Малтретирањето завршило кога еден од клиентите дознал дека девојчињата се малолетни, по што им го дал телефонот за да се јават дома. Таткото на една од злоупотребуваните малолетнички го пријавил случајот во полиција. Надлежните поднесоа кривични пријави против нив, а истражен судија им одреди притвор. Еден од групата е во бегство.

„Поднесени се кривични пријави против С.И. од Велес, С.А. од Копер, Словенија, С.Ј. од Гостивар, В.Б. од Велес, К.Е. , Б.В. и Т.Ѓ. од Гостивар, осомничени за „трговија со малолетно лице“ и „организирање група и поттикнување на извршување на делата трговија со луѓе, со малолетно лице и шверцување мигранти“, информираат од МВР.

Кошмарот на двете малолетнички започнал на 22 април годинава, кога таксистот со кој се познавале, со „поло класик“ со велешки регистарски ознаки, место да ги донесе дома од село Лозово, ги однел во Скопје. Тука ги предал на полицаецот С.И., кој ја организирал групата.

„Тој веднаш почнал вербално да им се заканува, велејќи им: „Вие сега ќе работите за мене, бидејќи ми требаат пари“, а потоа им ги одзел мобилните телефони и физички ги нападнал“, вели Котевски. Потоа со соработниците од групата се сретнале во близина на словенечката амбасада, каде што се договориле девојките да ги префрлат во Гостивар, каде што ги сместиле во хотел.

Според Котевски, девојчињата биле однесени во Гостивар и сместени во хотел. Насилниците во наредните денови почнале да ги принудуваат девојчињата да даваат сексуални услуги во еден бар во градот. За тоа наплатувале од 2.000 до 8.000 денари. Пред три дена тие биле однесени во викендичка во мавровското село, каде што ги чекал клиент.

„Откако клиентот дознал дека девојките се малолетни, побарал од еден од групата да дојде да ги земе за да ги врати дома. Во меѓувреме, на една од девојките и' овозможил да се јави дома кај татко и'“, објаснува тој.

Подоцна од истиот телефон на таткото му биле упатувани закани дека треба да п��ати 20 илјади евра доколку сака да му ја вратат ќерка му. Таткото го пријавил случајот, по што веднаш биле организирани и преземени мерки и околу 22,15 часот дел од групата биле уапсени. Еден од нив се' уште е во бегство.

Полицаецот што ја организирал групата бил вработен во МВР во 2002 година, во тогашната единица „Лавови“. Последниве години работел во Одделот за посебни единици за надворешно обезбедување на дипломатско-конзуларните претставништва. (Д.Т.)