Студен ветер од Бугарија

Министерството за надворешни работи реагираше до бугарските власти и побара официјално да се објасни причината за одбивањето влегување на македонските здруженија и граѓани на 18 и на 25 април по повод одбележување на 95-годишнината од смртта на Јане Сандански. Како што велат од МНР, од бугарска страна добиле уверување дека ќе го испитаат случајот и повратно ќе реагираат.

Вчера за однесувањето на бугарската погранична полиција реагираа Светскиот македонски конгрес и голем број други здруженија што биле оневозможени да присуствуваат на одбележувањето на годишнината во организација на здружението ОМО „Илинден“.

„Постапките на бугарската полиција на 18 и на 25 април недвосмислено покажаа дека Софија продолжува со дискриминацијата кон Македонците и ги нарушува добрососедските односи. Очекувавме дека со членството во ЕУ Бугарија го надраснала минатото, но, за жал, нејзината антимакедонска политика потврдува дека доволно не пораснала за демократските вредности во сојузот на држави каде што членува“, изјави претседателот на Светскиот македонски конгрес, Тодор Петров.

Тој истакна дека ја отфрлаат изјавата на бугарското министерство за надворешни работи дека не станува збор за дискриминација од политички побуди, туку за, наводно, немање потребни документи за влез во Бугарија. СМК и здруженијата веќе испратиле протестна нота до ЕУ, ОБСЕ, Советот на Европа, Владата и до МНР на РМ и очекуваат нивна реакција.

Реакциите за проблемите со бугарската гранична полиција се студен ветер една седмица пред посетата на бугарскиот министер за надворешни работи Николај Младенов на државава. Се очекува Младенов на средбата со колегата Антонио Милошоски да разговара за договорот за добрососедство, што треба официјално да го потпишат.

Тимови од двете министерства го разгледуваат предлогот и се договараат за одредени делови. Договорот беше понуден од бугарските власти како услов за поддршка при приемот во ЕУ, но со барање за одредени отстапки од македонска страна. (М.П.)