Бомбашите убиваат и на рамазан

БАГДАД - Напаѓач самоубиец вчера изутрина се разнесе во канцеларија за воено регрутирање, при што уби десетици луѓе. Тоа е прв голем напад во муслиманскиот месец на постот рамазан - период што е понапнат отколку во претходните години поради претстојниот краен рок за американските сили да ја заменат нивната борбена мисија во Ирак со обука.

Според информациите во медиумите билансот на жртвите изнесува повеќе од 60 луѓе иако ирачките војници на местото на нападот јавија дека само десетици цивили и припадници на обезбедувањето биле погодени од експлозијата што се случи во близина на Бап ал-Муадан или Големата порта, на источната страна од реката Тигар, во близина на поранешното седиште на Министерството за одбрана. Војниците јавија дека извлекле 40 тела од урнатините.

Рамазан, кога муслиманите постат од зори до зајдисонце воздржувајќи се од вода, храна и цигари, последниве години донесе ескалација на бунтовничките напади во Ирак. Меѓутоа, оваа година има посебно значење, бидејќи Рамазан се совпаѓа со периодот што води до крајниот рок на 31 август кога американската војска ќе го намали своето присуство во Ирак на 50.000 војници, пренасочувајќи се од борбени операции во мисија, чија главна намера е да се обезбеди обука и помош за ирачките безбедносни сили.

Така, и рамазан и крајниот рок за Американците веројатно ќе бидат магнети за напади од бунтовниците кои се обидуваат да ја искористат трајната неизвесност околу политичките работи во Ирак и безбедносната ситуација, седум години по американската инвазија во 2003 година. (Њујорк тајмс)