Абу Граиб на израелски начин

ЕРУСАЛИМ - Поранешен израелски војник-жена објави фотографии на „Фејсбук“ на кои таа е во униформа и насмеана се сликала покрај палестински затвореници со врзани раце и очи, што наиде на остри критики од израелската војска и од палестински претставници.

Израелските веб-страници и блогови објавија две фотографи на жената. На едната таа седи со вкрстени нозе покрај Палестинец со заврзани очи, кој е потпрен на бетонски ѕид. Неговото лице е свртено надолу, додека таа се наведнува кон него и го гледа нагоре. На другата фотографија таа насмеана гледа во камерата додека зад неа се тројца Палестинци со врзани раце и очи. Инцидентот е потсетување на напнатите односи меѓу израелските војници и Палестинците од Западниот Брег, што е под нивна контрола.

Израелските војници предизвикуваа проблеми на социјалните мрежи, како што се „Фејсбук“ и „Јутјуб“ и порано. Неодамна група војници беа прекорени, бидејќи вежбаа кореографски танцувачки движења додека беа во патрола во градот Хеброн, на Западниот Брег. Танцот беше прикажан на „Јутјуб“. (АП)