Москва протера романски шпион

МОСКВА - Руската Федерална служба за безбедност вчера преку ТВ-снимки покажа како во понеделникот бил фатен Габриел Греку, романски шпион кој имал статус на дипломат. Греку дошол во голема самопослуга во Москва, каде што требало да преземе информација, оставена во сандаче за работи. Во договореното сандаче биле оставени воени информации, што ги донел граѓанин на Русија, кого пред две години романските разузнавачи се обидуваа да го врбуваат. Иако во Москва не се наведува за кој руски граѓанин станува збор, најверојатно тоа е некој од пензионираните полковници, кој некогаш официјално контактирал со странски дипломати.

Габриел Греку работел под покритие дека е дипломат во статус на прв секретар на политичкото одделение на амбасадата во Москва. Руските експерти тврдат дека руските разузнавачки служби го зголемиле интересот за информации што се однесуваат на Молдавија, Приднестровје и делови од Украина што граничат со Романија. (Б.В.)