Пијани жени направиле инцидент на патарина
Тројца скопјани предизвикале инцидент на наплатниот пункт на автопатот Тетово-Гостивар, одбивајќи да платат патарина, напаѓајќи го вработениот, а потоа и полициските службеници кои дошле да го расчистат случајот. Според МВР, инцидентот се случил завчера, околу 3,50 часот, кога М.П. од Скопје, која под дејство на алкохол го управувала автомобилот „сузуки свифт“, а во кое како сопатници се превезувале М.Д. (31) и В.Х.Н. (31), исто така, под дејство на алкохол, одбила да плати патарина, излегла и физички го нападнала вработениот на наплатниот пункт, по што се обидела да го испрска со спреј.
„Во меѓувреме, на патарината се формирала подолга колона од возила, и од БМВ, со непознати странски национални ознаки, излегле три лица и едно од нив ја предупредило сопатничката да го тргне возилото. Откако таа одбила, лицето го скршило стаклото на прозорецот и физички ја нападнало М.Д., нанесувајќи и' повреди на главата, додека другите две лица ја нападнале В.Х.Н., нанесувајќи и' повреди на главата и по телото“, соопшти полицијата.
По ова лицата влегле во возилото и заминале во правец на Скопје. Пристигнале и полицајци, кои се обиделе да ги приведат тројцата пијани скопјани. Но, според МВР, М.П., М.Д. и В.Х.Н. физички ги нападнале и ги омаловажувале полициските службеници, нанесувајќи им видливи повреди. По целосно расчистување на случајот ќе бидат преземени соодветни законски мерки. (Г.А.)
|
