Претходен број

Сега и слободата на говорот станува услов за ЕУ

Во сите области генерално ќе се регистрира некаков прогрес, остануваат многу отворени прашања

Од нашиот дописник
Слободанка Јовановска

Брисел - Ниту една од осумте точки кои Брисел и' ги даде како услов на Македонија за добивање датум за преговори нема да остане без забелешка идната недела, кога шефот на дипломатијата, Антонио Милошоски, и шведскиот претседавач Карл Билд идниот понеделник ќе расправаат за прогресот на нашата држава кон Европската унија. Иако во сите области генерално ќе се регистрира некаков прогрес, остануваат многу отворени прашања, од кои некои се одраз на немањето политичка волја во Владата да се сменат работите во правец што ќе ја одведе државата напред.

Првпат, исто така, Охридскиот договор се враќа на голема врата во документ на ЕУ, па му се дава место како да е посебен услов, а исто така се нагласува потребата од обезбедување слобода на говор и на медиумите, како и слобода на собирање.

Вака сумирано ќе биде пораката од состанокот на Советот за стабилизација и асоцијација идниот понеделник во Брисел, кој е највисока форма на дијалог меѓу ЕУ и Македонија, само два месеца пред извештајот на Европската комисија, од кој ќе зависи дали петта година по ред нема да добиеме датум за преговори.

Како што се дознава неофицијално, ЕУ ќе и' порача на Владата дека парламентот не треба да биде и натаму машина за гласање, туку дека треба да си ја остварува својата улога во донесување поквалитетно законодавство, иако се констатира дека има регуларна координација меѓу партиите и е донесен Деловникот.

За начинот на кој поминаа изборите ќе се каже дека е важен чекор напред за демократијата во земјата, но ќе се побара одговор и акција околу извештаите за притисоци и вознемирувања на гласачите и ќе се побара повторно информација до каде е судењето на тие што учествуваа во изборни инциденти. За Охридскиот договор Брисел ќе порача дека е клучен политички критериум, при што треба да се обезбеди целосна имплементација на Законот за јазиците, да се промовира интеграција на заедниците и да се решат интеретничките тензии на локално ниво. Првпат ќе се побара рамноправна застапеност на Турците и на Ромите, но и ќе се инсистира квантитативното исполнување на оваа обврска да стане и квалитативно, односно, освен етничката припадност, да се внимава и на квалификациите.

За судството и за јавната администрација ставовите веќе се антика, од тоа дека првото се' уште треба да ја зајакне независноста, а во јавниот сервис да се одбегне политичката интервенција во кадровската политика. Гонењето на корупцијата на високи нивоа е отидена далеку според Брисел, но таа и натаму е многу раширена во земјата. Брисел ќе ни ги спомне и вратените досиеја од Хаг со порака дека од тоа како ќе се справиме со нив ќе зависи како тие ќе го ценат судството во Македонија.

Главната порака, сепак, ќе биде за името, но бајата, со повторување на потребата од заеднички прифатливо решение како суштинско нешто за нашата евроинтеграција. Брисел нема да го заборави спорот со ЕВН кој ќе го спакува дипломатски како непокажување доволно прогрес во јакнењето на владеењето на правото и спроведувањето на договорите, а потоа и подиректно со пораката дека треба да се обрне посебно внимание на некои отворени прашања во однос на дискриминацијата во енергетскиот сектор. Австрија досега не ги искористи сите средства во ЕУ за да притисне околу овој спор, но ако и ова предупредување не даде резултат, реално е да се очекува да го заостри курсот, иако зборот вето се' уште не се слуша во Брисел.

Околу економската ситуација во земјата, ЕУ неофицијално ќе порача дека стабилноста и предвидливоста се задржани, но дека има нарушување на платниот баланс кон странство, па фискалната дисциплина станува многу важна.

Генерално, Брисел е задоволен од тоа како се остварува Спогодбата за стабилизација и асоцијација и ќе препорача таа да премине во втората фаза. На состанокот в понеделник првпат ќе се промовира во Брисел новиот министер за евроинтеграција, Васко Наумовски.

Инаку, шведскиот шеф на дипломатијата изјави завчера дека не може уште сега да каже дали ќе ја турне одлуката за датум за Македонија, бидејќи се' ќе зависи од извештајот на ЕК. И околу преговорите за името тој излезе од вообичаената фразеологија, изразувајќи надеж дека ќе се најде решение. Дипломатските процени во Брисел се дека, и покрај забелешките, може да се каже дека Македонија исполнува пет од осумте услови на Оли Рен, при што најнегативни се оцените за судството и за јавната администрација.