Со оклопно возило преку погрешно паркираните

ВИЛНУС - Градоначалникот на Вилнус, главниот град на Литванија, е снимен како со оклопно возило уништува автомобил непрописно паркиран на велосипедска патека. „Ете што ќе се случи ако непрописно го паркирате вашиот автомобил“, рече градоначалникот Артурас Зуокас, страстен велосипедист, на снимката објавена на веб страницата на градот Вилнус. Потоа пристигна сопственикот на автомобилот за да види како го влечат неговиот уништен „мерцедес“.

Подвигот е снимен за време на викендот за популарна серија на шведската телевизија „99 работи што треба да ги направите пред да умрете“.

„Вилнус изгледа пријателски, модерен и полн со изненадувања - како и градоначалникот на градот“, објавува веб страницата на градот Вилнус, цитирајќи го домаќинот на шведската телевизија Мацка Едлунд.

На видео снимката, Зуокас го нервира сопственикот на автомобилот, го мете скршеното стакло од уништениот автомобил, а потоа се качува на велосипед и заминува - сценарио во кое би уживале многу велосипедисти.

„Треба да се има чувство за хумор во мојата работа и мислам дека тоа би било начин да се привлече внимание на фактот дека градот има намера да биде активен во борбата против непрописното паркирање“, објавија вестите на „Смол ворлд“ цитирајќи го градоначалникот.

Зуокас одамна бара од жителите да користат велосипеди, и воведе различни велосипедски патеки откако има мандат. (Би-Би-Си)