Претходен број

Милошоски очекува одговор од Бакојани

Атина првично го обвини Милошоски дека се обидува да го дефокусира вниманието на проблемот со името

Димитар Чулев

Писмото од министерот Антонио Милошоски до шефицата на грчката дипломатија, Дора Бакојани, воопшто не требало да биде објавено во јавноста. Дипломатски извори во македонското МНР велат дека „адресантот бил прецизно наведен и од Дора Бакојани се очекуваше да демонстрира минимум дипломатска култура и да одговори барем со куртоазно повратно писмо“.

Наместо тоа, портпаролот на грчкото МНР, Јоргос Кумуцакос, завчера ги информирал грчките новинари за писмото и, притоа, индиректно го обвини Скопје дека „се обидува да го дефокусира вниманието од главниот проблем“. Јоргос Кумуцакос на брифинг со грчките новинари рече дека Атина целосно верувала дека напорите на двете земји мора да се фокусираат на прашањето за името, кое го карактеризирал како „критично“, како и врз преговорите под посредство на ОН.

Како што јави грчката новинска агенција АНА, Кумуцакос уште додал дека „решението за овој проблем (прашањето за името) ќе биде катализатор (за подобри односи)... какво било друго однесување би било само тактика за одолжување во обид да се изместат приоритетите, како и обид за одвратување на преговорите“.

Ваквото „толкување“ и отворените обвинувања од Кумуцакос, велат во македонското МНР, но и прашањата од некои медиуми за маркетиншка поврзаност на писмото на Милошоски со неделните избори, биле причината што Министерството завчера го објави писмото во јавноста. Милошоски и' предлага на Бакојани потпишување македонско-грчка декларација за пријателство, добрососедство и соработка, натаму, основање заеднички комитет за образование и историја, како и рамковен предлог за унапредување на на билатералните односи.

Вакви предлози во слична или поинаква форма македонската страна предлага неколку пати последниве години, но од грчка страна едноставно не покажуваат заинтересираност.

Иницијативи прв пат биле предложени на средбата Нимиц-Димитров-Василакис, која се одржа минатиот јануари во Охрид. Предлогот за основање заеднички комитет за образование и историја Милошоски го спомена и на прес-конференција во Скопје кон крајот на февруари, одговарајќи на нападите на Бакојани дека Македонија „го избрала патот на национализмот, будејќи ги балканските сеништа од историјата“. Во таа смисла, Милошоски во писмото посебно ја истакнува потребата од формирање комитет за образование и историја: „Земајќи ја предвид искажаната чувствителност на Грција за историските прашања, верувам дека еден од можните чекори за градење доверба меѓу двете држави и народи е заедничко разгледување на историските настани“, се вели во писмото.

Во МНР вчера беа благо разочарани дека конкретните предлози Бакојани оставила да ги „коментира“ портпаролот Кумуцакос. Поентата, велат во МНР, била да се сублимираат предлозите кој македонската страна неколку пати и' ги предлагаше на Атина со намера да се зголеми довербата меѓу двете држави и да започнат нормални контакти помеѓу двете влади на различни нивоа, кои би ја олесниле комуникацијата. Во Министерството за надворешни работи, сепак, не ја исклучуваат можноста шефицата на грчката дипломатија да одговори, а писмото-одговор да стигне пред нејзината посета на Македонија најавена за по претседателските и локалните избори.

Кумуцакос завчера во Атина најави дека Бакојани ќе го посети Скопје во својство на претседавач на ОБСЕ, потенцирајќи притоа дека посетата нема никаква врска со билатералните односи или со спорот за името.

„Елефтерос типос“ вчера пренесе дека Бакојани сепак планирала да одговори на писмото на Милошоски. Весникот потсетува дека Караманлис претходно бил „опсипан од писма“ од својот колега Груевски, а писмото на македонскиот министер го оценува како „враќање назад кон епистоларната политика“.