Претходен број

Дали Иванов самиот се стави под мраз за ТВ-дебати

Кандидатот на ВМРО-ДПМНЕ не се појави и на дебатата на Алсат М

Билјана Јовановска

Претседателскиот кандидат на ВМРО-ДПМНЕ неделава не се појави во две дебатни емисии на националните телевизии Телма и Алсат М, а завчера поради негативниот одговор од неговиот Изборен штаб, во МТВ беше откажано снимањето на уште едно такво соочување на седумте претенденти на врвната функција во државата. Дали фаворитот на власта самиот се става, условно речено, под мраз или е тоа одлука на партијата која го кандидира вчера не успеавме да дознаеме, зашто Центарот за комуникации на ВМРО-ДПМНЕ остана глув на нашите повици.

Ваквиот несекојдневен однос на некој кој допрва треба да ги освојува симпатиите кај граѓаните за едни е крајно неразбирлив, додека други го толкуваат тоа како најобичен страв од директните соочувања со оние кои мислат поинаку и „можат да го извадат од контрола“.

Сашо Ордановски, директор на телевизијата Алсат М, непојавувањето на Ѓорге Иванов во дебатните емисии го коментира како катастрофална одлука за демократијата во Македонија, како страв од натамошен пад на рејтингот и како голема стратегиска грешка на ВМРО-ДПМНЕ и на нивниот кандидат. „Дебатата на нашата телевизија ја следеле околу 240.000 гледачи од кои над 110.000 биле Македонци и припадници на други етнички групи, што

говори дека со отсуството господинот Иванов не ги навреди само Албанците, туку голем дел од вкупното гласачко тело во Македонија“, вели Ордановски. Потсетува дека „во политиката непринципиелното играње со телевизиите, на крајот, секогаш завршува со пораз за оние кои мислат дека на таков начин можат да ја манипулираат јавноста“. Директорот на Алсат М смета дека „Иванов пропуштил голема шанса да ги објасни своите ставови пред голем дел од гледачите и да докаже дека неговите демократски заложби навистина се демократски во практика“.

Комуникологот Климе Бабунски не сака да навлегува во евентуалните приватни причини за ваквиот однос на Иванов, ама за него не постои јавно оправдување. „Кога некој сака да биде јавна личност, сета логика на појавувањата во дебатни емисии и на митинзи во јавноста, воопшто, е да докаже дека може да ја носи одговорноста што ја има претседателската функција. Сега јавноста е скратена за правото да ги оценува кандидатите, а со тоа да ги вреднува и да им верува или не“. За експертот за комуникации „евентуалната теза дека е доволна подршката на најбројната партија е самоубиствена, дотолку повеќе што, условно кажано, станува збор за независен кандидат кој претендира на функција за која својот кредибилитет нема да го црпи од партиски книшки, туку од довербата на јавноста. Бабунски е уверен дека „покрај сите досега манифестирани равенки со многу непознати, јавноста во Македонија е доволно зрела правилно да го оцени појавувањето и непојавувањето на кандидатите“.

Коментар на прашањето зошто во дебатите отсуствува Иванов, побаравме и од неговиот главен конкурент - Љубомир Фрчкоски, кој ни изјави: „Кандидатот е избран така да претставува празно место. Тоа го кажав на мојот прв прес и ме критикуваа дека сум бил преостар, но се покажа како суперточно. Неговиот премиер сака да биде како во секое село и провинција - батко Ѓорѓија - односно, да биде и претседател и премиер и министер и градоначалник. И во таа смисла, така е дизајниран целиот проект. Тој треба да биде претседателски кандидат, восочна фигура од музејот на ВМРО-ДПМНЕ и да не се појавува никаде“. Фрчкоски смета дека на Иванов „му забраниле да зборува, бидејќи им прави инциденти, им го урива рејтингот и најрадо би го замрзнале и би го одмрзнале на 23 март да му соопштат дека изгубил на изборите. Каде што ќе зине, ем нас не' срами ем нив, а граѓаните успеаја да го видат тоа“. Идејата на Изборниот штаб на опозицискиот претседателски кандидат е „таквиот концепт да биде поразен, а не само да не биде виден, бидејќи е срам за Македонија и зборува за уставен пуч во кој местејќи вакви луѓе на значајни функции, премиерот добива овластувања какви што нема со Уставот“.

Последните информации од телевизијата А1 говорат дека Ѓорге Иванов, сепак, нема да го пропушти последното соочување со своите противкандидати. Главниот уредник Младен Чадиковски, кој ќе биде и водител на емисијата која се најавува со логото „Време е за одлука“, вели дека од штабот на владејачката ВМРО-ДПМНЕ вчера потврдиле дека нивниот кандидат „сигурно доаѓа во вечерашната дебата“, која треба да се емитува во 21 часот.