Владата заборави на најпогодените сектори
За металската и текстилната индустрија нема посебни мерки, реагираат стопанствениците
Јасмина Јовановска
Стопанствениците ја испофалија Владата за економските мерки против глобалната криза. Сепак, му забележаа на премиерот Никола Груевски дека во пакетот нема ништо за најпогодените сектори - металската и текстилната индустрија. Во овие сектори веќе се чувствуваат последиците од кризата. Обемот на работа се намалува, работниците се пуштаат на привремен одмор, а некои од текстилните погони се затвораат.
Токму од најзагрозените сектори немаше претставници на саботната средба со премиерот Груевски и економските министри. Имаше само околу петнаесетина бизнисмени затоа што, според објаснувањето, „салата била мала за сите членки на трите стопански комори“. По состанокот, наместо вицепремиерот Зоран Ставрески, како што беше најавено, се појави премиерот Никола Груевски, веројатно за да ги образложи подетално економските мерки.
Експертите и стопанствениците од фирмите најголеми извозници рекоа дека мерките не се секторски насочени и дека не одговараат на потребите што ги наметнува глобалната криза.
Премиерот Груевски најави дека Владата ќе биде на штрек за нови интервенции и останува со бизнисмените да се договорат каде уште треба да се реагира.
„Владата и натаму продолжува да ја следи состојбата. Се разбира, доколку се укаже потреба за некоја друга мерка за којашто и тие и ние ќе најдеме дека може да биде корисна и истовремено да не биде штетна на некоја друга страна во економијата, ние сериозно би размислиле за такво преземање“, истакна претседателот на Владата.
Тој потсети дека пред да ги претстави десетте мерки, Владата има преземено уште една мерка која, според него, е поволна за компаниите. Станува збор за намалувањето на социјалните придонеси што треба да почне да се применува од 1 јануари 2009 година.
Претседателите на Стопанската комора, на Сојузот на стопанските комори на Македонија (ССК) и на Комората на северозападна Македонија не избираа зборови за да ја пофалат Владата.
Според Мирче Чекреџи од Сојузот на стопански комори на Македонија, пакетот-мерки на Владата се донесени во вистински момент, во пресрет на последиците од светската криза.
„Тие не само што се антикризни туку некои од нив ќе останат во подолг период и ќе бидат одличен стимул за развој на стопанството. Во вистинско време се носи нешто што е инјекција за стопанството“, потенцира Чекреџи. Тој смета дека дел од предложените мерки, како што се данокот на добивка и намалување на царините, директно ќе ја зголемат инвестиционата способност на компаниите.
И Стопанската комора на Македонија, главно, задоволна е од предложениот владин пакет-мерки. Но, побара со Владата да се разговара и за мерките што ги нема во пакетот, а би можеле да ја подобрат состојбата во челичната и текстилната индустрија. Според нив, мерките не се специјални мерки, туку претставуваат континуитет на соработката со Владата.
„Мерките се симболичен гест дека Владата ќе биде со нас и ако дојде до потешки состојби. Факт е дека компаниите и ние како нивни претставници имаме партнер што секогаш ќе биде со нас и тогаш ако дојде до прелевање на кризата во реалниот сектор, во димензии кои ќе бидат многу проблематични“, подвлече претседателот на Комората, Бранко Азески.
Од владините економски мерки е задоволна и Комората на северозападна Македонија. „Малку или ниедна од предвидените фискални мерки во пакетот ќе можат да се искористат од нашите членки, но другиот дел доста поволно ќе влијае на нив“, рече Џемаил Даути од Стопанската комора на северозападна Македонија. |
