Oсум новозаболени случаи од сида
И натаму сидата најчесто се пренесува по хетеросексуален пат
Годинава во Македонија се регистрирани осум нови случаи на сида. Со нив од 1987 година, кога се појави првиот случај заклучно до вчера, во земјава се откриени 111 ХИВ заразени лица, од кои 60 се починати. И натаму сидата најчесто се пренесува по хетеросексуален пат. Меѓу заболените доминира младата сексуално активна популација од 23 до 40-годишна возраст, и најголем дел од нив се од машкиот пол.
Со тоа што годинава има само осум новозаболени, министерот за здравство, Бујар Османи, кој вчера, по повод 1 Декември - Меѓународниот ден за борба против сида, го посети Центарот за доброволно советување и тестирање на ХИВ/сида, при Клиниката за инфективни болести и фебрилни состојби, истакна дека Министерството за здравство прави максимални напори Македонија да ја одржува во земјите со ниска преваленца на вирусот и тоа преку тринаесетте центри за советување и бесплатно тестирање за ХИВ/сида. „Во соработка со меѓународни организации ние ја покриваме целокупната терапија што им е потребна на заболените лица, а се дава според најсовремените протоколи“, изјави министерот Османи, кој додаде дека Министерството ќе продолжи со промоција на пропагандни материјали за да се подигне свеста за ризикот и последиците од ХИВ/сида.
Националниот координатор за ХИВ/сида, Милена Стефановиќ, додаде дека осумте новорегистрирани случаи се веќе заболени од сида, а двајца од нив се починати. Таа апелираше за навремено тестирање од вирусот кое, пред се', како што рече, е добро за пациентите и нивно контролирање и лекување.
Во 13 центри во земјава лоцирани на Инфективната клиника, во поликлиниката „Бит-пазар“, во Републичкиот завод за здравствена заштита и во десетте Заводи за здравствена заштита, во последните шест месеци се направени околу 1.000 тестови за дијагностицирање на ХИВ. (Ј.Ј.) |
