Претходен број

Сенка врз ѕвездените моменти на Владата

Власта влегува во предизборие со изменет амбиент и бран незадоволства, а изгледаше дека се' е под контрола

Соња Крамарска

Владата неочекувано се најде пред два големи предизвика во пресрет на претседателските и на локалните избори што ќе се одржат во март идната година. Тоа се штрајкот на просветарите и штрајкот на дел од фармерите, како и растечката економска криза, што се' заедно може да го усложни предизборниот амбиент кој досега беше во стопроцентна корист на владејачката десница.

Загриженоста се виде и завчера на лицето на премиерот Никола Груевски, кој веднаш по враќањето од посетата на Норвешка ја свика Владата и донесе вонредни економски мерки тешки 330 милиони евра за справување со финансиската криза. Оваа криза, според оцените на Владата, дошла со задоцнување во нашата земја, но тоа ниту најмалку нема да ги намали негативните ефекти ако мерките не ги дадат очекуваните резултати.

Штрајкот, пак, на просветните работници се заканува навистина да им ги загорчи деновите на премиерот и на Владата. Просветарите, барем како што изгледа од нивните настапи, немаат намера да отстапат од своите барања за зголемување на платите, а Владата, пак, е решена да не попушта на такви притисоци. Сето тоа дополнително го комплицира амбиентот во земјава и го прави далеку поразличен од атмосферата што беше присутна само пред неколку месеци.

Опозицискиот СДСМ, правејќи се' за да се врати на сцената, зазеде поактивен однос кон штрајкот и веќе отворено го поддржува. Како што рече Андреј Петров, член на Извршниот одбор на социјалдемократите, тие „ги поддржуваат барањата на просветарите за зголемување на хранарината и на превозот“. „СДСМ застанува во одбрана на правото на штрајк“, објави опозициската левица, со што првпат по подолго време ја легитимираше својата социјалдемократска ориентација во одбрана на правата на работниците.

Како потврда на затегнатиот амбиент се повеќедневните препукувања меѓу владејачката ВМРО-ДПМНЕ и опозицискиот СДСМ околу овој штрајк, а судирот се очекува да кулминира во парламентот, бидејќи социјалдемократите поднесоа интерпелација против министерот за образование, Перо Стојановски.

Обидот на Владата преку своите медиуми да го задуши штрајкот на просветарите, како што стојат работите засега, остана безуспешен, и не само тоа, туку предизвика нови незадоволства против нејзината политика во образовниот сектор.

Истовремено, Федерацијата на фармерите поднесе барање за средба со премиерот Никола Груевски со закана дека доколку тој не прифати да се сретне и да разговара со нив, в понеделник ќе излезат на протест пред зградата на Владата.

Владата, пак, во обид да се пресмета ��о штрајкувачите во образованието, преку посебен платен оглас се обрати до јавноста, велејќи дека економската криза во светот ја зафатила и Македонија и дека најмногу се погодени металопреработувачката, текстилната, чевларската индустрија и градежништвото. Со тоа, всушност, Владата првпат призна дека економските движења во земјава се движат во лоша насока.

И министерот за економија, Фатмир Бесими, завчера изнесе загрижувачки оцени во јавноста, велејќи дека ако светската финансиска криза потрае, Македонија може да очекува влијание врз трговскиот биланс и врз инвестициите. Тоа несомнено е нов момент што може да води кон влошување на расположението и растење на стравот дека по политичките турбуленции на кои е изложена нашата земја во врска со името и евроатлантските интеграции, ќе следуваат и драматични економски падови.

Сите овие случувања ескалираа во последниве неколку денови и тоа во моменти кога десноориентираната Влада на Македонија крои планови за апсолутно заземање на власта преку освојување на претседателската функција и мнозинството градоначалнички места низ земјава на изборната трка во март. Меѓутоа, политичките и економските трендови не и' одат во прилог онака како што се очекуваше и можат сериозно да стават крај на нејзините ѕвездени моменти.

Засега се' уште нема знаци дека земјава би можел да ја зафати бран штрајкови, но според мрачното расположение што владее во одделни буџетски и бизнис-сфери, на Владата нема да и' биде лесно во наредниот период. Нашите информации велат дека Груевски им го предочил тоа на своите најблиски соработници пред извесно време, навестувајќи влошување на политичката и на економската клима во земјава.

Македонските граѓани имаат причини и за политичко незадоволство, бидејќи ветуваното укинување на визниот режим, според најновите сигнали од ЕУ, нема да се спроведе толку лесно и толку брзо. Крајот на оваа година, според проекциите и на власта, а и на Брисел, за Македонија требаше да значи добивање датум за преговори со ЕУ, финиширање на процедурата за укинување на визите и засилување на позициите за членство во НАТО. Но, не се случи ништо од тоа.

Премиерот Груевски, пак, половина од оваа седмица ја потроши на гости во Норвешка, каде што ги развиваше релациите на Македонија со оваа скандинавска држава. Во Скопје го остави својот заменик Зоран Ставрески да ги гасне пожарите, но дали вицепремиерот беше успешен во тоа или, пак, ќе дојде до нивно разгорување наскоро ќе се види. Едно е сигурно, а тоа е дека шефот на Владата не излегува во јавноста да соопштува лоши вести, туку сака да носи само добри вести кои засекогаш ќе му гарантираат место меѓу ѕвездите.