Хрватска потерница по Иво Санадер

Експремиерот се бара за злоупотреба на функцијата и учество во криминална организација

ЗАГРЕБ - Хрватското обвинителство издаде меѓународен налог за апсење на поранешниот премиер Иво Санадер, кој ја напушти земјата кратко време пред парламентот да му го одземе имунитетот од гонење за да се овозможи спроведување истрага во врска со корупција. „Да, издаден е налог за апсење“, изјави портпаролот на полицијата Крунослав Боровец за Ројтерс. Во налогот објавен на веб-сајтот на Министерството за внатрешни работи се наведува дека Санадер се бара за „злоупотреба на функцијата и учествување во заедничка криминална организација“.

Локалните аналитичари посочија дека потегот против човекот што доминираше во локалниот политички живот цела една деценија ќе и' помогне на кандидатурата на Загреб за членство во ЕУ. Хрватска се надева дека следната година ќе ги заврши разговорите за влез во ЕУ, но пред тоа треба да го убеди Брисел за нејзината одлучност да ја искорени корупцијата. „Ова, секако, се добри вести за нашите ЕУ-разговори, но можеби уште поважно за иднината на нашата демократија, за прашањето на транспарентноста и финансирањето на партиите, што досега беше на многу ниско ниво“, вели политичкиот аналитичар Давор Ѓенеро.

Хрватскиот адвокат Мато Матиќ изјави дека Санадер го контактирал преку СМС-порака за да го ангажира и да ги негира шпекулациите дека ја напуштил земјата. „Тој ми кажа да ги информирам институциите дека не побегнал и ќе се врати за три или четири дена“, изјави Матиќ за државната телевизија. Санадер во четвртокот замина во соседна Словенија, но неговото сегашно престојувалиште е непознато.

Иво Санадер стана премиер во 2004 година, но неочекувано и без објаснување поднесе оставка во јули 2009 година. Неговата владејачка ХДЗ го исклучи од партијата во јануари. Тој честопати се жалеше на политички прогон и ги отфрли сите обвиненија за корупција како политички мотивирани.

Главниот државен обвинител на Хрватска, Младен Бајиќ, во јануари годинава на американски дипломат му кажал дека против поранешниот премиер Иво Санадер се води истрага за неколку случаи на корупција, се наведува во објавените тајни документи на „Викиликс“.

„Обвинителите спроведуваат истрага против поранешниот премиер, која во најмалку еден случај би можело да резултира со обвинение, а откриваат и докази во неколку други случаи во кои бил вмешан Санадер“, изјавил Бајиќ пред американскиот амбасадор во Загреб, покажуваат документите на „Викиликс“ што ги објави лондонскиот весник „Гардијан“.

Весникот нагласува дека според документите од „Викиликс“, се стекнува слика за Хрватска како земја проткаена со корупција, но, исто така, и се оддава признание на кампањата против борбата со корупцијата на актуелната влада на Јадранка Косор. (Ројтерс)