Претходен број

Брисел одлучува за Фуере, а не Скопје

Фуере нема информација дека било барано укинување на една од неговите функции

Тамара Грнчароска

Владата никогаш не разговарала на темата да бара од Брисел повлекување на позицијата специјален претставник на ЕУ во Македонија, која, заедно со функцијата претставник на Европската комисија во земјава, моментално ја врши Ерван Фуере.

Ова вчера ни го потврдија извори од македонската Влада, кои тврдат дека се чисти шпекулации информациите оти постои несогласување во владината коалиција околу мисијата на специјалниот претставник на ЕУ во земјава. Портпаролот на Владата, Мартин Мартиновски, за оваа тема кратко изјави дека кога станува збор за ЕУ, „Владата на секоја седница една третина од времето разговара за евроинтегративните процеси, што е исполнето, што треба да се направи за да се исполнат критериумите за ЕУ“ и ништо друго.

И самиот специјален претставник на Унијата во Македонија, Ерван Фуере, вчера рече дека тој нема информација дека премиерот Никола Груевски барал такво нешто. „Секоја одлука за мандатот на специјалниот претставник на ЕУ е работа за членките во Брисел, а не за тука“, изјави Фуере, додавајќи дека „во меѓувреме продолжувам со мојот мандат, имаме многу работа пред нас и ќе ја посветам сета моја енергија таа да се исполни во текот на мојот сегашен мандат“.

И двете засегнати страни вчера, неофицијално, ја коментираа забуната, т.е. идентификувањето кое се прави меѓу мисијата на специјалниот претставник на ЕУ и на Мисијата на ЕУ во земјава. За тоа, според нив, во многу придонеле непрецизните информации во медиумите, поточно неразграничувањето на тие две функции кои моментално ги врши еден дипломат. Фуере е првиот европски претставник во земјава, но воопшто во Европа, кој истовремено е носител на тие две функции. До неговото доаѓање во Ма��едонија, во ноември 2005 година, специјален претставник на ЕУ во земјава беше Михаил Салин, додека шеф на Мисијата на Европската комисија во Скопје беше Донато Кијарини.

Фуере, во име на ЕК, во 2005 година беше именуван за координација со економската и техничката соработка меѓу ЕУ и Македонија, додека од високиот претставник за заедничка надворешна и безбедносна политика на ЕУ, Хавиер Солана, како специјален претставник беше именуван да се грижи за безбедносните и политичките прашања во земјава. Идејата за еден дипломат кој ќе ги претставува двете европски мисии, како што се дозна тогаш, дојде од кабинетот на Солана од каде што сметаа дека во периодот кога земјава се соочуваше со сериозни реформи, на Европа и' требаше подобра координација во Македонија. Како специјален претставник на ЕУ, Фуере, освен Салин, ги наследи и Франсоа Леотар, Алексис Брунс, Ален Лероа и Сорен Јесен Петерсен. Фуере е шестиот специјален претставник на ЕУ во земјава.

Тогаш очекувањата беа дека кога Македонија ќе го добие статус на кандидат за членство во Унијата, ќе се укине функцијата специјален претставник на ЕУ во земјава. Ставот на Владата во 2005 година беше дека специјалната мисија на ЕУ треба да заврши со завршувањето на мандатот на Салин.

Специјалниот претставник на Унијата, именуван директно од високиот претставник за заедничка надворешна и безбедносна политика на ЕУ, прв пат беше назначен по почетокот на конфликтот во 2001 година, со специјална мисија задолжена за управување со кризни ситуации, т.е. со задача да го следи процесот на разврска на конфликтот, а потоа и имплементирањето на Рамковниот договор.

Како што вчера неофицијално информираа дипломатски извори во земјава, таа позиција нема да биде укината се' додека целосно не се имплементира Рамковниот договор од кој како незавршени преостануваат децентрализацијата и граничното управување. Политичкиот дијалог, како дел од сето тоа, исто така, спаѓа под „мониторинг“-обврските на специјалниот претставник на ЕУ. Според неофицијални дипломатски извори, „политичкиот дијалог во Македонија, таков каков што е“, на ЕУ и' овозможува да ја држи таа позиција отворена колку што сака.

Фуере вчера се обиде да ја објасни моменталната улога на специјалниот претставник на ЕУ во земјава, велејќи оти смета дека има многу недоразбирања околу значењето на неговото присуство. „Некои го поврзуваат присуството на специјалниот претставник во земјата со криза, но тоа не е случај“, рече Фуере. „Специјалниот претставник на ЕУ е тука за да ги поддржи, советува, да помогне, да ги поттикне сите реформи кои се потребни во една земја-кандидат како што е Македонија“, објасни тој. Како што рече Фуере, ЕУ сака да ги види аспирациите на граѓаните за европски интеграции исполнети колку што е можно побрзо.