Претходен број

Хаос со доставата на даночните решенија

Фирмата која ги дели фактурите за данок на имот вчера извиси стотина граѓани кои си ги чекаа решенијата

Граѓаните кои до 10 јули нема да ги добијат решенијата сами треба да ги подигнат од Градот

Сања Наумовска

По неколучасовно чекање на топло и спурно време, нервоза и загубени драгоцени часови стотина скопјани и вчера не ги добија своите решенија за данок на имот за 2009 година. Граѓаните, собрани пред филијалата на Прокредит банка во Ново Лисиче, чекаа да дојдат претставници на фирмата „Глобко логистик“, која годинава е избрана од Градот Скопје, да ги подели решенијата. Најголемиот дел од граѓаните беа пензионери, но и вработени кои ја користеа паузата од работа да ја завршат и оваа новонаметната обврска.

Имено, иако беше најавено дека решенијата за данок ќе бидат носени од врата на врата, по завршувањето на десетдневниот рок, фирмата се премисли, па оние решенија што и' останале неподелени, наводно, поради тоа што сопствениците не биле најдени дома, почна да ги дели на улица на пунктови. За промената, граѓаните дознавале од ливчиња оставени во сандачињата за пошта, со прецизирање на локациите кој каде да си го бара своето решение.

Во Градот Скопје, пак, за да се зголеми конфузијата во целиот случај информираа дека недоставените решенија ќе се бараат на шалтерите во Прокредит. Но, од банката демантираа, посочувајќи дека Градот никогаш не им побарал такво нешто. До Прокредит се обратиле единствено од фирмата која врши достава, но биле одбиени. Затоа од „Глобко“ одлучиле решенија да делат на импровизирани масички поставени на јавна површина, во парковите пред филијалите. По сите компликации и дезинформации, на голем број скопјани се' уште не им беше јасно како и кога ќе го добијат своето решение и кому да му се обратат.

Вчера, по три часа чекање пред банката во Ново Лисиче, на луѓето им беше соопштено дека никој нема да дојде, како и дека „Глобко“, втор пат за два дена, го менува начинот на достава. Во следните седум дена решенијата повторно ќе се носат од врата на врата, а оние кои нема да ги добијат, ќе треба самите да си дојдат во бараките на Градот Скопје.

Револтирани, присутните коментираа дека досега секогаш потврдата им била доставувана како и останатата пошта и дека немало никаков проблем. Сега, иако некои морале да доаѓаат дури од населбите Пролет или Аеродром, повторно не ја завршиле работата. Тие прашуваат што би се случило ако вака би се комплицирала доставата на секоја сметка што ја добиваат.

„Јас живеам во зграда на булеварот ’АВНОЈ’ и кај нас никој нема добиено решение за данок. Не е точно дека не не' нашле дома, бидејќи во зградата има и постари луѓе кои се постојано дома“, вели еден граѓанин. Приказната ја потврдува и жителка на населбата Јане Сандански, која дошла да го земе решението на својата 90-годишна мајка. Таа тврди дека старицата не излегува и дека не е можно некој да заѕвони на врата, а да не ја најде дома.

„Ако сакаат Градот и општините да си ги соберат парите, треба да се потрудат барем да ги донесат фактурите, а не, кај што треба да им платам, морам дури да го изгубам цел ден и сам да си дојдам по сметката“, се нервираше еден бизнисмен, по подолго чекање.

Кај „Три бисери“ во Аеродром, пак, доставувачите на „Глобко логистик“ не ги испорачале решенијата за сите станови во зградата. На зачудените жители кои си ги побарале своите документи им рекле дека за некои има, а за некои не.

Проблемот за ова, велат во „Глобко“, е во Градот Скопје од каде што секојдневно им праќаат одреден број решенија од сите десет општини кои тие треба да ги достават. Што ќе добиеме, тоа се дистрибуира, велат во фирмата и затоа откако ќе заврши втората тура достава на врата на 10 јули, сите оние кои ќе останат без решение ќе треба самите да си се обратат во Градот Скопје.

Од Градот, пак, тврдат дека на фирмата „Глобко“ целокупната база на подароци и' била доставена наеднаш, пред да почне делењето на решенијата. Таа имала обврска, според условите наведени во тендерот на кој беше избрана, да ги испечати решенијата и да ги достави на рака на сопствениците.

„Предвидениот датум за стартување на дистрибуцијата беше пречекорен поради технички проблеми со печатењето на решенијата, кое требаше да го изврши фирмата. Во продолжение на дистрибуцијата се испречи проблемот со временските услови кои го намалуваат дневниот ефект на дистрибутерите. Испечатените 146. 747 решенија се дистрибуираат, согласно со законот, на домашна адреса на даночните обврзници, а доколку не се дома, им се оставаат известувања каде можат да ги подигнат“, велат во Градот, од каде што информираат дека фирмата веќе нема технички пречки и наредните денови ќе се интензивира дистрибуцијата. Решенијата ќе се делат меѓу 9 и 13 и меѓу 17 и 21 часот.